viasna on patreon

Праз два гады следчыя вырашылі вярнуць тэхніку фігурантам “справы прафсаюзаў”

2019 2019-09-16T14:20:08+0300 2019-09-20T13:23:15+0300 be https://spring96.org/files/images/sources/fiadynich-vivat.jpg Праваабарончы цэнтр «ВЯСНА» Праваабарончы цэнтр «ВЯСНА»
Праваабарончы цэнтр «ВЯСНА»
Генадзь Фядыніч на судзе па "справе прафсаюзаў". Фота: ПЦ "Вясна".

Генадзь Фядыніч на судзе па "справе прафсаюзаў". Фота: ПЦ "Вясна".

“Пасля таго, як у СМІ з’явіўся адкрыты ліст да кіраўніка Адміністрацыі прэзідэнта Наталлі Качанавай, у якой перакладчык Леанід Шчукін патлумачыў сітуацыю з нашай тэхнікай, патэлефанавалі з гарадскога ўпраўлення Следчага камітэта і заявілі, што мы можам забіраць свае тэлефоны і камп’ютары”, – распавёў сайту palitviazni.info прафсаюзны лідар Генадзь Фядыніч.

Нагадаем, што ў жніўні 2018 года суд Савецкага раёна прыгаварыў кіраўнікоў прафсаюза РЭП Генадзя Фядыніча і Ігара Комліка да 4 гадоў абмежавання волі без накіравання ва ўстановы адкрытага тыпу з забаронай займаць кіроўныя пасады тэрмінам на 5 гадоў.

Іх прызначылі вінаватымі на падставе ч.2 арт.243 Крымінальнага кодэкса Рэспублікі Беларусь («ухіленне ад выплаты падаткаў у значнай суме»).

А вось тэхніку, якую следчыя забралі падчас ператрусаў у жніўні 2017 года, вяртаць не спяшаліся.

“Тэхніка і зараз яшчэ знаходзіцца ў сталічным упраўленні Следчага камітэта, – кажа Генадзь Фядыніч. – Мы рабілі некалькі запытаў з гэтай нагоды, але нічога не дапамагала, хаця ўсе суды ўжо даўно прайшлі і пастановы вынесеныя. Амаль год прайшоў пасля суда”.

Прафсаюзны лідар распавядае, што фігурантам “справы прафсаюзаў” патэлефанавалі 13 верасня і заявілі, што нарэшце можна забраць тэхніку.

“У 2011 годзе ў нас ужо канфіскоўвалі камп’ютары, і калі вярталі, мы іх на месцы не праверылі, – працягвае Генадзь Фядыніч. – А ўжо ў офісе высветлілася, што нам спалілі жорсткія дыскі, сапсавалі аптычныя дыскі, флэш-карты таксама былі ў непрацоўным стане. Таму зараз я папярэдзіў следчага, што мы на месцы будзем правяраць усю тэхніку. Праўда, ніякіх пярэчанняў не было, следчы сказаў: “Гэта вашае права”.

Генадзь Фядыніч мяркуе, што вяртанне тэхнікі – гэта рэакцыя на адкрыты ліст прафесійнага перакладчыка і сябра прафсаюза РЭП Леаніда Шчукіна, які праходзіў сведкам па гэтай справе, да кіраўніка Адміністрацыі прэзідэнта Наталлі Качанавай.

“У Шчукіна забралі ўсю аргтэхніку – тэлефон і тры камп’ютары яго і жонкі, – працягвае суразмоўца. – Але ў матэрыялах справы ёсць заключэнне экспертаў Следчага камітэта пра тое, што ў тэхніцы перакладчыка ніякіх матэрыялаў, якія прадстаўлялі інтарэс для праваахаўнікаў, не знайшлі. І з Вярхоўнага суда быў адказ, што ў межах “справы прафсаюзаў” забраная” ў Шчукіна “маёмасць рэчавымі доказамі не прызнавалася. Не ведаю, ці супадзенне гэта, але адразу пасля публікацыі адкрытага ліста тэхніку вырашылі вярнуць. Але, паўтаруся, у Следчы камітэт пойдзем са спецыялістам, якія праверыць усе камп’ютары на прадмет спраўнасці. Усяго нам павінны вярнуць каля 15 камп’ютараў”.


 Навіны ад Spring96.org у Telegram. Падпішыся на наш канал https://t.me/viasna96

Апошнія навіны

Партнёрства

Сяброўства