У бундэстагу выказаліся пра Еўрапейскія гульні і правы чалавека ў Беларусі

Камітэт па правах чалавека нямецкага парламента раскрытыкаваў сітуацыю ў Беларусі.

У заяве, апублікаванай на сайце бундэстага, адзначаецца, што камітэт лічыць правядзенне ў Мінску Еўрапейскіх гульняў нагодай "акцэнтаваць увагу на вельмі крытычным становішчы з правамі чалавека і прымяненні смяротнага пакарання ў Беларусі", а таксама "настойваць на адчувальным і хуткім паляпшэнні" у гэтай сферы, піша БелаПАН.

"Беларусь — адзіная краіна на еўрапейскім кантыненце, якая па-ранейшаму выносіць і прыводзіць у выкананне смяротныя прысуды. Першыя пазітыўныя крокі да ўвядзення мараторыя на выкананне гэтага віду пакарання на мінулым тыдні былі сарваныя выкананнем смяротнага прысуду", — гаворыцца ў заяве.

Камітэт нагадвае, што прапановы БДІПЧ АБСЕ аб змене выбарчага заканадаўства, у тым ліку празрысты падлік галасоў і ўключэнне прадстаўнікоў апазіцыі ў склад выбарчых камісій, не былі рэалізаваныя беларускімі ўладамі.

"Замест гэтага падчас мясцовых выбараў 18 лютага 2018 году зноў былі выяўлены парушэнні. У цяперашнім і наступным годзе чакаюцца парламенцкія і прэзідэнцкія выбары. У іх напярэдадні можна было б зноў паспрабаваць ажыццявіць у жыццё прапановы БДІПЧ АБСЕ", — лічаць у бундэстагу.

Урад Нямеччыны, Савет Еўропы і Еўрапарламент "рэгулярна нагадваюць пра неабходнасць захавання правоў чалавека — але да гэтага часу без дастатковага поспеху". "Тым не менш намаганні павінны працягвацца, напрыклад, у рамках дыялогу аб правах чалавека паміж ЕС і Беларуссю (...) і ў рамках паездкі прадстаўніка федэральнага ўрада на Еўрапейскія гульні ў Менск", — прапануюць парламентарыі.

Дэпутаты раскрытыкавалі таксама абмежаванне свабоды СМІ, сходаў і аб'яднанняў у Беларусі. Апазіцыі "пастаянна ствараюць перашкоды ў яе палітычнай працы". Дзяржаўныя рэпрэсіі накіраваны на "праваабаронцаў, апазіцыйных палітыкаў, журналістаў і блогераў, адвакатаў і прафсаюзных дзеячаў". Дзейнасць незалежных няўрадавых арганізацый "па-ранейшаму моцна абмежаваная".

"Унутрыпалітычны працэс рэформаў стагнуе, умовы ўтрымання пад вартай вельмі дрэнныя, і нават малалетнія атрымліваюць драконаўскія тэрміны зняволення за злачынствы, звязаныя з наркотыкамі", — адзначаецца ў заяве.

"Нягледзячы на ​​асобныя прыкметы адкрытасці і суправаджаючага яе збліжэння з Еўрапейскім саюзам, якія прыкметныя з моманту вызвалення палітвязняў у 2015 годзе, сітуацыя з правамі чалавека па-ранейшаму выклікае трывогу. Неабходны пераканаўчы і надзейны курс на станаўленне прававой дзяржавы і захаваньне правоў чалавека, а таксама адмену смяротнага пакарання", — падкрэслівае камітэт.

Акрамя таго, лічаць нямецкія парламентарыі, Еўрапейскія алімпійскія камітэты пры вызначэнні патрабаванняў да арганізатараў буйных спартыўных спаборніцтваў павінны больш ўлічваць сітуацыю з правамі чалавека ў краінах-кандыдатах.

Заяву камітэта бундэстага ўхвалілі фракцыі ХДС/ХСС, СДПГ (сацыял-дэмакраты), СвДП (свабодныя дэмакраты) і Саюз-90/"Зялёныя". Левыя устрымаліся, а ўльтраправая АДГ («Альтэрнатыва для Германіі») прагаласавала супраць. Гэтыя фракцыі заявілі, што не ўдзельнічалі ў падрыхтоўцы дакумента.

У жніўні 2018 года прэзідэнт Нямецкага алімпійскага саюза Альфонс Хёрманн не выключыў байкоту II Еўрапейскіх гульняў у Менску з-за пераследу журналістаў. У інтэрв'ю Нямецкаму радыё ён заявіў тады, што саюз быў з самага пачатку супраць перадачы беларускай сталіцы права праводзіць гэтыя спаборніцтвы. Пагроза байкатаваць гульні не была рэалізаваная.

  Навіны ад Spring96.org у Telegram. Падпішыся на наш канал https://t.me/viasna96