“Выпадковы” экаактывіст: берасцейскі суд пакараў штрафам Яўгена Саўчука ў другі раз
Яўген Саўчук
Адміністрацыйную справу экалагічнага актывіста Яўгена Саўчука разгледзеў 5 чэрвеня суд Ленінскага раёна Берасця.
Як паведамляе “Берасцейская Вясна”, пратакол правапарушэння быў складзены па ч. 1 арт. 23.34 КаАП (удзел у несанкцыянаваным масавым мерапрыемстве) за удзел у мітынгу і шэсці 7 красавіка. У міліцэйскім пратаколе пазначана: “7 красавіка удзельнічаў ў вулічным шэсці па вуліцах Брэста і крычаў “Не заводу!”
З матэрыялаў справы: “Гарвыканкам дазволу на шэсце не даваў”. Сам Яўген Саўчук не пагадзіўся з абвінавачваннем, бо 7 красавіка прыехаў з Маларыты у Берасце і, пабачыўшы шмат людзей, далучыўся да іх, каб паслухаць.
“Адносінаў да людзей, што кормяць галубоў я не маю, прыйшоў упершыню...”, — патлумачыў суду хлопец.
Суддзя Дмітрый Шурын пастанавіў пакараць Яўгена Саўчука 10-ю базавымі штрафа.
Сёлета Саўчука ўжо прыцягвалі да адміністрацыйнай адказнасці за ўдзел у шэсці праціўнікаў акумулятарнага завода. Ён быў затрыманы 14 красавіка, а на наступны дзень адбыўся суд, які пакараў актывіста штрафам у памеры 10 базавых велічынь. Такім чынам, другі суд для Яўгена Саўчука адбыўся за яго “удзельніцтва ў несанкцыянаванай акцыі” кармлення галубоў у першы для яго раз.
