Актывісты абмеркавалі будучыню кампаній за здаровае навакольнае асяроддзе Фота

У Мінску 12 студзеня адбылася сустрэча актывістаў з розных куткоў краіны, на якой абмяркоўваліся экалагічныя праблемы рэгіёнаў і грамадскія кампаніі, якія б дапамаглі вырашыць гэтыя праблемы.

Актывісты ды праваабаронцы з Берасця, Магілёва, Светлагорску, Наваполацку, Маладзечна ды іншых гарадоў, занепакоеныя будаўніцтвам шкодных прадпрыемстваў ці ўжо працуючымі заводамі, сабраліся на новай праваабарончай пляцоўцы “Тэрыторыя правоў”, каб распрацаваць шляхі павялічэння эфектыўнасці ўжо існуючых мясцовых кампаній па абароне правоў жыхароў на здаровае навакольнае асяроддзе. 

Фота ПЦ "Вясна"

Так, ужо больш года ў Берасці мясцовыя жыхары змагаюцца супраць будаўніцтва акумулятарнага завода. Праведзены незалежныя экспертызы вытворчасці, напісана мноства скаргаў і зваротаў, сабраныя тысячы подпісаў супраць заводу АКБ. І галоўнае, кожную нядзелю жыхары Берасця выходзяць на цэнтральную плошчу горада, каб пакарміць галубоў – і тым самым выказаць мірны пратэст супраць шкоднага будаўніцтва. Што яшчэ і колькі трэба зрабіць, каб будаўніцтва спынілі? Па меркаванні мясцовых актывістаў, ім усем не хапае салідарнасці і сумесных дзеянняў на рэспубліканскім узроўні. 

Пасярэдзіне - Аляксандр Кабанаў. Фота ПЦ "Вясна"

Пра недахоп салідарнасці казала і лідэрка экалагічнага супраціву ў Светлагорску Алена Маслюкова. Таксама яна адзначыла важную ролю крэатыўных акцый – такіх, якія праходзяць у Берасці. Яны натхняюць і выклікаюць цікавасць у людзей, нават тых, хто раней не цікавіўся пэўнымі экалагічнымі праблемамі. 

Алена Маслюкова, фота ПЦ "Вясна"

Адносна нядаўна ў СМІ пачалі казаць пра новы экалагічны канфлікт у Магілёве. Актывісты патрабуюць ад дзяржавы правесці экалагічную экспертызу мясцовасці, дзе размясціўся завод па вытворчасці тэхнічнага вугляроду «Омск Карбон Магілёў». Па меркаванні каардынатара кампаніі “За здаровы Магілёў” Андрэя Бодзілева, у горадзе не хапае якаснай незалежнай экспертызы, што магчыма было б выправіць праз больш шчыльнае ўзаемадзеянне паміж рэгіёнамі. 

Пасярэдзіне - Андрэй Бодзілеў. Фота ПЦ "Вясна"

Ідэю шчыльнай супрацы падтрымалі ўсе ўдзельнікі сустрэчы, і па яе выніках быў распрацаваны план сумесных дзеянняў на бліжэйшы час, які грунтуецца на абмене досведам і супольнай інфармацыйнай працы. Так, у хуткім часе будзе створана суполка ў Facebook, дзе будуць публікавацца навіны пра экалагічныя праблемы ўсіх рэгіёнаў і змаганне людзей за іх вырашэнне.

Фота ПЦ "Вясна"