Журналісты БАЖ у спрэчках з дзяржавай апелююць да ААН
Журналісты-фрылансеры Беларускай асацыяцыі журналістаў (БАЖ) Тамара Шчапёткіна, Ларыса Шчыракова, Андрэй Толчын і Кастусь Жукоўскі па выніках працы у 2018 годзе падалі індывідуальныя скаргі ў Камітэт ААН па правах чалавека. На міжнародным узроўні яны заявілі пра сістэматычны пераслед за атрыманне і распаўсюд інфармацыі, паведамляе "Гомельская Вясна".
У мінулым годзе фрылансера Кастуся Жукоўскага суды прыцягвалі да буйных грашовых штрафаў 17 разоў на агульную суму каля 13 700 руб., Яго калегу Андрэя Толчына судзілі 9 разоў на суму каля 7 200 руб. за супрацоўніцтва з польскім тэлеканалам "Белсат", дзе паказваліся адзнятыя імі рэпартажы аб розных мясцовых праблемах.
У Бярозе, Брэсцкай вобласці ўлада чатыры разы выпісвала буйныя штрафы журналістцы Тамары Шчапёткінай, якая супрацоўнічае з Беларускім "Радыё Рацыя", у выніку чаго яна павінна дзяржаве больш за 3-х тыс. руб. Гомельская журналістка Ларыса Шчыракова, якую судзілі за працу на "Белсаце", павінна каля 2-х тыс. руб. штрафаў.
«Фактычна за прафесійную журналісцкую дзейнасць на працягу года я заплаціў штрафаў на суму звыш 5,6 тыс. еўра, што перавышае сярэднегадавы заробак па краіне агулам. Мяне ўлада пераследвала праз ваенкамат, двойчы заклікалі на ваенныя зборы, што б не даць магчымасці працаваць. Мы гэтую барацьбу выстаялі, выстаім і тут», - падвёў вынікі года Кастусь Жукоўскі.
І хоць беларускія ўлады пакуль не рэагуюць на рашэнні Камітэта ААН па правах чалавека, фрылансеры лічаць, што пытанне выканання рашэнняў, якія прымаюцца ў Жэневе, -пытанне будучыні, на якую сёння неабходна працаваць.
«Акрамя ўстанаўлення непасрэдных парушэння нашых правоў, у скаргах мы ставім пытанні пра абавязак беларускага ўрада змяніць нацыянальнае заканадаўства такім чынам, каб б практыка яго прымянення не прыводзіла ў далейшым да апісаных намі парушэннях», - заявіў фрылансер Андрэй Толчын.
Нагадаем, у дачыненні да незалежных журналістаў-фрылансераў беларускі ўрад вядзе бескампрамісную барацьбу. Нягледзячы на большую колькасць скаргаў у Камітэце ААН па правах чалавека, чыноўнікі працягваюць паўтараць - акрэдытацыя дабро, якое не заўважаюць журналісты.
«У разуменні еўрапейскіх каштоўнасцяў і стандартаў правоў чалавека акрэдытацыя з'яўляецца інструментам, якія палягчаюць магчымасці журналістаў на атрыманне інфармацыі, нашы ж чыноўнікі лічаць яе дазвол на працу», - падкрэслівае юрыст ПЦ "Вясна" і БАЖ Леанід Судаленка.
Ён таксама дадаў, што ў цяперашні час у Камітэце ААН па правах чалавека на разглядзе знаходзяцца больш за дзесятак індывідуальных паведамленняў беларускіх журналістаў-фрылансераў, звязаных з пераследам за працу без акрэдытацыі на рэдакцыі замежных СМІ.
«Іншага шляху няма, будзем падымаць гэтыя пытанні на міжнародным узроўні. Колькасць заўсёды перарастае ў якасць, рана ці позна чыноўнікі нарэшце зразумеюць, што інфармацыя - гэта не тое, на што трэба пытаць дазвол у дзяржавы», - дадаў эксперт.
