viasna on patreon

Наступствы светлагорскага флэшмобу - затрыманні і пратаколы Дапоўнена

2018 2018-09-20T17:49:31+0300 2018-09-20T20:42:12+0300 be https://spring96.org/files/images/sources/masliukova2018.jpg Праваабарончы цэнтр «ВЯСНА» Праваабарончы цэнтр «ВЯСНА»
Праваабарончы цэнтр «ВЯСНА»
Алена Маслюкова. Фота - ПЦ "Вясна"

Алена Маслюкова. Фота - ПЦ "Вясна"

20 верасня праваабаронцу са Светлагорска Алену Маслюкову выклікалі ў мясцовы РАУС у якасці асобы, у дачыненні да якой вядзецца адміністрацыйны працэс па артыкуле 23.34 КаАП (удзел ці арганізацыя несанкцыянаванага масавага мерапрыемства).

Прычына такой цікавасці праваахоўных органаў да праваабаронцы – нібыта яе ўдзел у мерапрыемстве супраць працы ў горадзе завода па вытворчасці беленай цэлюлозы, якое адбылося ў суботу 15 верасня. І хоць улады на гэты дзень запланавалі іншае мерапрыемства, людзі ўсё роўна сабраліся на цэнтральнай плошчы і правялі запланаваны флэшмоб супраць смярдзючых выкідаў з кітайскага заводу.

У РАУС міліцыянт Дзмітрый Шпак склаў на Алену Маслюкову пратакол па ч 1. артыкула 23.34 – за тое, што яна “ўдзельнічала ў несанкцыянаваным масавым мерапрыемстве (флэшмобе)”. Праваабаронца з пратаколам не пагадзілася, бо лічыць, што флэшмоб не з’яўляецца масавым мерапрыемствам, а яе прысутнасць на плошчы не мусіць аўтаматычна трактавацца як яе ўдзел у ім.

Акрамя гэтага, у міліцыі праваабаронца даведалася, што пасля флэшмобу міліцыянты затрымалі трох хлопцаў, адзін з якіх быў непоўнагадовы.

“Іх не затрымлівалі на плошчы. Вядома, што гэта адбылося праз некаторы час пасля заканчэння флэшмобу. Хлопцы пайшлі на набярэжную, дзе разгарнулі бел-чырвона-белы сцяг і пачалі з ім фатаграфавацца. Гэта заўважылі міліцыянты і пайшлі да іх. Хлопцы спрабавалі збегчы, і калі міліцыянты дагналі іх, то склалі пратаколы за непадпарадкаванне службовым асобам (па атрыкуле 23.4 КаАП). Непоўнагадовага адпусцілі адразу пасля складання пратакола, а дваіх поўнагадовых пакінулі ў ізалятары да панядзелка”,  - распавяла Алена Маслюкова ПЦ "Вясна" пасля пахода ў РАУС. 

Нагадаем, што напярэдадні мерапрыемства Алену Маслюкову выклікаў на размову пракурор раёна А. Яўсеенка і папярэдзіў аб адказнасці за парушэнне заканадаўства аб масавых мерапрыемствах, палічыўшы, што Маслюкова можа быць арганізатарам несанкцыянаванага масавага мерапрыемства.

Акрамя Алены позву ў светлагорскую міліцыю паводле артыкулу за несанкцыянаваны мітынг атрымаў грамадзкі актывіст Анатоль Змітровіч. На яго таксама быў складзены пратакол па артыкуле 23.34 КаАП.

Апошнія навіны

Партнёрства

Сяброўства