«Бязвіз» не дапамог: амэрыканск_ую перформэр_ку не пусцілі ў Беларусь
Алок Вэйд-Мэнан
Грамадзян_ку ЗША індыйскага паходжання Алок Вайд-Мэнон 31 ліпеня не прапусцілі праз мяжу ў Нацыянальным аэрапорце «Мінск», сказала Радыё Свабодзе актывістка Віка Біран.
Сцісла:
- Алок Вайд-Мэнон — «індыйска-амерыканская гендарна-небінарная паэтка-перформэрка-транс-актывістка», як апісвае яго часопіс Makeout. Пэрформэр, які публічна выкарыстоўвае ў дачыненні да сябе займеннік «яны», меўся выступаць у Мінску на закрытым воркшопе пра эмоцыі для ЛГБТК-людзей.
- Прыляцеў у Беларусь па «бязвізе» а 15-й гадзіне рэйсам з Амстэрдаму і мусіць правесці ў аэрапорце 18 гадзінаў да наступнага рэйсу ў Амстэрдам.
- Сярод прычынаў забароны на ўезд называюць пагрозу нацыянальнай бяспецы, грамадзкаму парадку і абароне насельніцтва Беларусі.
У атрадзе памежнага кантролю «Мінск» Свабодзе пацвердзілі, што Вайд-Мэнона не ўпусцілі ў Беларусь на падставе артыкулу 30 Закону аб прававым палажэнні замежных грамадзянаў і асобаў без грамадзянства. Які канкрэтна пункт артыкулу парушы_ла грамадзян_ка ЗША, афіцэр не ўдакладніў.
Паводле гэтага артыкулу адмовіць ва ўездзе могуць, калі знаходжанне замежніка ў Беларусі супярэчыць:
- нацыянальнай бяспецы;
- грамадзкай бяспецы;
- абароне маральнасці;
- абароне здароўя насельніцтва;
- абароне свабодаў грамадзянаў і іншых асобаў.
«Гэты грамадзянін не дэпартаваны, яго проста адправяць назад у Амстэрдам найбліжэйшым рэйсам 1 жніўня ў 9.30», — паведаміў Свабодзе прадстаўнік Дзяржаўнага памежнага камітэту Беларусі.
Як сказала Віка Біран, Алок Вайд-Мэнон паведамі_ла праз тэлефоне, што звязваўся з амбасадай ЗША ў Мінску. У амбасадзе патлумачылі, што «гэта выглядае як законная справа». Пацвердзіць гэтую інфармацыю ў амбасадзе ЗША не ўдалося.
«У Алока забралі рэчы і пашпарт, бо такія ўмовы. Яшчэ ёсць здагадка, што яны там галадаюць, бо яны веганы, а мінскі аэрапорт не дае опцыяў веганскай ежы», — сказала Біран.
Удакладненне: Алок Вайд-Мэнон прыляце_ла у Мінск ад_на. Перформэр_ка публічна выкарыстоўвае ў дачыненьні да сябе займеннік «яны».
Вайд-Мэнон мусі_ла выступіць 1 жніўня з публічнай лекцыяй у Мінску. Выступ «Femme in Public» мусіў спалучаць:
- паэтычны вечар «Femme in Public» паводле аднайменнай кнігі перформэр_кі;
- даследаванне па гендэрнай некамфортнасці і феміннасці.
Алок планава_ла распавесці пра свой досвед дыскрымінацыі, вулічнага гвалту і перажывання сыстэмнай траўмы, якія адчувае як нябел_ая, трансгендерн_ая мігрант_ка ў «белай», кансэрватыўнай Амерыцы.
