Міліцыя Заслаўя выклікае ўдзельнікаў акцыі «Астравецкі шлях» - будуць складаць пратаколы
Круглы стол у Заслаўі 26 траўня па тэме будаўніцтва Астравецкай АЭС.
Удзельнікаў акцыі «Астравецкі шлях» супраць будаўніцтва Беларускай АЭС, якая прайшла 26 траўня ў Заслаўі, выклікаюць у мясцовае аддзяленне міліцыі. Вядома, што позвы для складання пратаколаў аб адміністрацыйным правапарушэнні атрымалі Вячаслаў Сіўчык, Ігар Лялькоў, Іван Лагвіновіч. Іх абвінавачваюць у арганізацыі і ўдзеле ў несанкцыянаваным масавым мерапрыемстве па арт. 23.34 КаАП.
У сацыяльных сетках паведамляецца, што на 5 чэрвеня ў Заслаўскі аддзел міліцыі Мінскага РАУС выклікаюць жыхара Маладэчна Івана Лагвіновіча і жыхара Мінска Ігара Лялькова.
Нагадаем, 26 траўня ў Заслаўі пад Менскам прайшла акцыя «Астравецкі шлях» супраць будаўніцтва Беларускай АЭС, у якой бралі ўдзел паўтары дзесяткі чалавек, сярод якіх актывісты партыі «Зялёныя» і БХД, жыхары Заслаўя, Маладэчна, Радашковіч.
Прычым, Мінскі райвыканкам не дазволіў заяўнікам арганізаваць мітынг і тады яны прынялі рашэнне правесці экскурсію па горадзе і круглы стол для абмеркавання праблемы, а таксама збор подпісаў супраць будаўніцтва Астравецкай АЭС.
Арганізатары заявілі, што падобныя акцыі плануецца праводзіць штомесяц у розных гарадах Беларусі.
