Паўла Мажэйку аштрафавалі за інтэрв'ю 25 сакавіка Дапоўнена
Павел Мажэйка. Фота: Радыё Рацыя
Вядомы незалежны журналіст, былы палітвязень Павал Мажэйка атрымаў копію міліцэйскага пратаколу, які на яго склалі супрацоўнікі Ленінскага РАУС г. Гродна, перадае "Гарадзенская вясна".
У дакумеце паведамляецца, што пратакол складзены паводле ч. 4. арт. 35 і ч. 15 арт. 1 Закону Рэспублікі Беларусь “Аб сродках масавай інфармацыі”. Міліцэйскі пратакол сведчыць, што “Мажэйка П.І. 25 сакавіка 2018 г., знаходзячыся ў Каложскім парку г. Гродна, падчас правядзення масавага мерапрыемства, прысвечанага 100-годдзю БНР, не маючы акрэдытацыі журналіста замежнага сродку масавай інфармацыі, браў інтэрвію ў прамым этэры на сайце польскага тэлеканалу “Белсат”, прысутнага на мерапрыемстве Саранчукова В.В. і змясціў на сайце польскага спадарожнікавага тэлебачання Белсат з мэтай далейшага распаўсюджання, чым парушыў патрабаванні нормаў арт. 22.9 КаАП Рэспублікі Беларусь”.
14 траўня ў 14 гадзін на падставе гэтага пратаколу пачаўся судовы працэс над Паўлам Мажэйка. Падтрымаць былога палітвязня на суд прыйшлi праваабаронцы і журналісты.
Справу разглядаў суддзя суда Ленінскага раёна г. Гродна Дзмітрый Бубенчык. Сведкам выступаў намеснік начальніка аддзелу аховы i правапарадку Аляксей Вайцешка.
Пасля 20-хвіліннага перапынку Бубенчык вынес пастанову, згодна з якой Павал Мажэйка быў аштрафаваны на 35 базавых велічыняў (857 рублёў)
- Павал Мажэйка з пастановай суда. Фота ПЦ "Вясна"
