Праваабарончая праграма "Вясна" на Беларускім Радыё Рацыя Аўдыё
Кожны аўторак у 21:05 (паўтор у суботу ў 8:00) у эфіры незалежнай радыёстанцыі “Беларускае Радыё Рацыя” - праграма "Вясна", якая асвятляе падзеі, датычныя правоў чалавека ў Беларусі.
Анонс выпуска:
“Час выбараў”: На мінулым тыдні афіцыйна стартавала кампанія па выбарах у мясцовыя саветы дэпутатаў 28-га склікання. Адначасова з ёй пачалася і кампанія праваабаронцаў па назіранні за гэтымі выбарамі. На прэс-канферэнцыі, якая адбылася ў мінулы чацвер у Мінску, каардынатары кампаніі “Праваабаронцы за свабодныя выбары” Алег Гулак (БХК) і Уладзімір Лабковіч (ПЦ “Вясна”) распавялі пра сітуацыю, якая склалася напярэдадні кампаніі незалежнага назірання.
“Каментар”: У мінулыя выходныя ў Мінску адбылася навуковая канферэнцыя, прысвечаная тэме “Масавыя рэпрэсіі ў СССР у гістарычных даследваннях і калектыўнай памяці”, у якой прынялі ўдзел даследчыкі з Беларусі, Польшчы, Расіі і Украіны. Праваабаронца і кандыдатка філасофскіх навук Таццяна Процька падзялілася меркаваннем наконт ролі рэпрэсій у палітычнай сістэме СССР, а таксама правяла паралелі з сучаснай беларускай рэчаіснасцю.
“Асоба”: Працяг гутаркі з кіраўніком незалежнага прафсаюза радыёэлектроннай прамысловасці (РЭП) Генадзем Фядынічам. У жніўні гэтага года яму, а таксама бухгалтару арганізацыі Ігару Комліку, былі прад’яўлены абвінавачванні ў нясплаце падаткаў у буйным памеры. Зараз абодна фігуранты справы на волі, аднак следчыя дзеянні працягваюцца. Чаму менавіта зараз пачалася справа супраць незалежнага прафсаюза? Якая будучыня яго чакае? Генадзь Фядыніч дзеліцца сваімі меркаваннямі.
У музычных паўзах – кампазіцыі ў выкананні гурта In Extremo.
