Актывіста, які гаворыць шэптам, аштрафавалі за «гучную лаянку»
Прадстаўнік Беларускага незалежнага прафсаюзу РЭП Віктар Казлоў. Фота Радыё Свабода
Тамара Застаўнецкая, суддзя Гомельскага раёну, пасьля абвяшчэньня пастановы пра штраф рэгіянальнаму прадстаўніку прафсаюзу РЭП Віктару Казлову сыходзіла з залі паседжаньняў подбегам. Прысутныя ў залі праводзілі яе воклічамі: «Ганьба! Люстрацыю!».
13 красавіка, пасьля чатырох паседжаньняў, Застаўнецкая пакарала Казлова штрафам: дзьвюма базавымі велічынямі — за «гучную лаянку» (артыкул 17.1 КаАП) і яшчэ дзьвюма — за непадпарадкаваньне міліцыі (артыкул 23.34).
Па інфармацыі "Гомельскай Вясны", пакараньні судзьдзя склала з частковым пагашэньнем і канчаткова абвясьціла пра штраф у памеры трох базавых велічынь, што складае 69 рублёў:
«Для мяне гэты суд быў зьвязаны з маральнымі і фізычнымі пакутамі, — шэпча Віктар Казлоў. — Гучна лаяцца я ў прынцыпе не магу. Пасьля апэрацыі ў анкалягічным цэнтры голас страціўся. Сёньня судзьдзя выклікала лекара-анколяга даваць тлумачэньні, ці зьвяртаўся я ў паліклініку з прычыны страты голасу, ці магла на гэта паўплываць перанесеная апэрацыя. Апрача таго, я прынёс мэдычнае заключэньне ад 13 красавіка, у якім пазначана: падчас апэрацыі быў зроблены парэз мышцаў гартані. Лекар пацьвердзіў, што парэз, найхутчэй, прывёў да парушэньня голасаўтварэньня, пра гэта павінны дакладней сказаць лор альбо фаніятар. І ўсё адно судзьдзя прысудзіла штраф. Думаю, каб зьняць усе пытаньні пра лжэсьведчаньне амапаўцаў, якія абвінавацілі мяне ў гучнай лаянцы. Нічога не сказана ў пастанове і пра двое сутак арышту, якія я прэвэнтыўна адбыў 25–27 сакавіка».
Актывіста РЭП Віктара Казлова амапаўцы палку патрульна-паставой службы УУС Гомельскага аблвыканкаму Аляксандар Сярдзюк, Раман Курбатаў і Аляксандар Саўчанка затрымалі ўранку 25 сакавіка ў вёсцы Цярэшкавічы, калі ён выпраўляўся ў Гомель, каб удзельнічаць у «Маршы недармаедаў-2». Спачатку завезьлі ў райаддзел, адтуль прэвэнтыўна адправілі ў ізалятар, дзе ён двое сутак правёў за кратамі. У сваіх рапартах службоўцы напісалі: акурат 25 сакавіка ў аграгарадку Цярэшкавічы яны ахоўвалі грамадзкі парадак. Ехалі на аўтамашыне па вуліцах з хуткасьцю ня больш за 20 кілямэтраў у гадзіну і пачулі, што Казлоў гучна крычаў, лаяўся матам. Яны, канечне, спыніліся, папярэджвалі Казлова, але той на заўвагі не рэагаваў.
Такія расповеды выклікалі сьмех і зьдзеклівыя рэплікі на адрас амапаўскіх сьведак. Бо перад гэтым жыхар Цярэшкавічаў Віктар Тамашоў, які ішоў з Казловым па вуліцы на прыпынак грамадзкага транспарту, расказаў, як да іх падляцеў міліцэйскі УАЗік. Амапаўцы толькі спыталі прозьвішча ў Казлова і адразу запіхнулі яго ў машыну:
«Я, можа, два крокі зрабіў, як міліцэйская машына з Казловым адʼехала. Такое толькі ў кіно па тэлевізары бачыў», — казаў суду Тамашоў.
Да таго ж Віктар Казлоў яшчэ 4 красавіка прадставіў суду даведкі з анкалягічнага цэнтру, дзе яму выдалілі паўлёгкага. Пасьля апэрацыі ён наагул крычаць ня можа і размаўляе пераважна шэптам.
Гомельскі палітык Васіль Палякоў, які прысутнічаў на судзе і сам адседзеў нібыта за хуліганства 25 сакавіка 8 сутак арышту, лічыць, што штраф Казлову цалкам чаканы, хоць і крыху меншы, чым звычайна:
«Судовая сыстэма цяпер ня можа даваць збоі — яе рыхтуюць да наступных рэпрэсіяў, наступных прысудаў. Наперадзе — даволі цікавы час. Абвастрэньне сацыяльна-эканамічных праблемаў будзе выштурхоўваць людзей на вуліцу. Улады, выкарыстоўваючы міліцыю і суды, будуць гэтаму супрацьдзейнічаць. Таму судзьдзя Застаўнецкая не магла па-іншаму паводзіць сябе, вынесьці іншы прысуд. Судзьдзям даводзіцца ісьці на зьдзелку з сумленьнем, пераступаць церазь сябе і свае прынцыпы і станавіцца саўдзельнікамі рэпрэсіяў, па сутнасьці — саўдзельнікамі злачынства».
