Затрыманы рэдактар партала «Рэальны Брэст»: У міліцыі мне спрабавалі лыжкай расціснуць зубы
28 сакавіка Ленінскім РАУС Брэста быў затрыманы індывідуальны прадпрымальнік, рэдактар партала «Рэальны Брэст» Дзяніс Марук.
Па інфармацыі "Нашай Нівы", Дзяніс рабіў рэпартажы з маніфестацый «недармаедаў». На адной з акцый ён паказаў сярэдні палец чалавеку ў цывільным, які здымаў яго на камеру.
«Мне свецяць «суткі» за непрыстойны жэст на адрас супрацоўніка міліцыі, — расказаў «Нашай Ніве» Марук. — Але пачакайце, які ж ён супрацоўнік міліцыі, калі ён быў без знакаў адрозненняў?»
Дзяніс быў не згодны з выстаўленым яму абвінавачваннем, якое патрабавалі падпісаць. Пасля гэтага, сцвярджае ён, яго пачалі жорстка збіваць.
«Каб захаваць свае відэаматэрыялы я засунуў флэшку ў рот. Мяне пачалі біць яшчэ больш жорстка, аб падлогу, па нагах, па нырках. Засунулі нейкую брудную лыжку ў рот, спрабуючы выцягнуць флэшку, парвалі ўсю вопратку».
Толькі калі ў кабінет зайшоў нехта з начальства, з рэдактарам партала пачалі размаўляць спакойным тонам, расказаў Марук «Нашай Ніве».
«Мне сказалі, што на першы раз мяне даруюць і выпісалі штраф: дзве базавыя велічыні за дробнае хуліганства (арт 17.1 КаАП). Аднак я не збіраюся пакідаць гэта проста так. Цяпер буду здымаць пабоі. Я не аспрэчваў тое, што паказаў чалавеку ў цывільным сярэдні палец. Але за што ж збіваць мяне?» — абураецца ён.
У той жа час у Ленінскім РАУС Брэста «Нашай Ніве» паведамілі, што да іх такі грамадзянін не паступаў.
