Праваабаронца Павел Левінаў з ізалятара часовага ўтрымання шпіталізаваны ў кардыялогію

У Віцебску 26 сакавіка супрацоўнікамі міліцыі быў прэвентыўна затрыманы праваабаронца Беларускага Хельсінскага камітэту Павел Левінаў. Яго доўга трымалі ў РУУСе, склалі пратакол адміністратыўнага правапарушэння па арт 23.34 КаАП (удзел у несанкцыянаваным масавым мерапрыемстве).

У аддзяленні міліцыі яму стала блага і праваабаронцу выклікалі хуткую. Дактары  далі некалькі таблетак, аднак яны не дапамаглі.

Пасля змяшчэння Левінава ў ізалятар часовага ўтрымання, стан здароўя пагоршыўся яшчэ больш.

Выкліканыя ў другі раз медыкі шпіталізавалі праваабаронцу ў Віцебскую гарадскую клінічную бальніцу № 1.

Рыхтуецца тэрміновая інфармацыя аб затрыманні Паўла Левінава Спецдакладчыку па абароне праваабаронцаў і ў Працоўную групу па затрыманнях ААН.