“Арганізатара” маршу недармаедаў у Берасці выклікаюць у міліцыю

Пратакол-апытанне склалі на сябра Аб’яднанай грамадзянскай партыі, удзельніка збору подпісаў супраць падатка на дармаедства Аляксандра Кабанава.

Паводле пратакола, - піша Беларускае Радыё Рацыя, - ён арганізаваў марш недармаедаў у Берасці 26 лютага і прымаў у ім удзел. Запыт на складанне пратакола прыйшоў з Берасця, кажа актывіст:

– Прыйшоў факс датычна таго, каб апытаць мяне ў сувязі з нядзельнай акцыяй у Берасці. Я нават не чытаў тыя пытанні, а проста сказаў, што ніякіх паказанняў даваць не буду, спасылаючыся на арт. 27 Канстытуцыі Рэспублікі Беларусь. Яны так гэта і аформілі: паказанні даваць адмовіўся.

Позва, выпісаная актывісту з Бярозы на нядзелю, 5 сакавіка. Яму давядзецца ў гэты выходны дзень выпраўляцца ў Берасце.