Ад кобрынскага актывіста судовыя выканаўцы запатрабавалі тэрмінова выплаціць штраф за ўдзел у Дні Волі
7 красавіка Цэнтральным судом горада Мінска Алесь Мех быў пакараны штрафам памерам 50 базавых велічынь (10 мільёнаў 500 тысяч) за ўдзел у акцыі 25 сакавіка 2016 года ў Мінску. Хаця А.Мех сцвярджаў у судзе, што не прымаў актыўнага ўдзелу у акцыі, а проста прысутнічаў, суддзя паверыла сведчанням міліцыі. Фотаматэрыялы з боку Аляксандра Меха суддзёй не былі прыняты да ведама.
Актывіст абскардзіў рашэнне суда Цэнтральнага раёна сталіцы ў Мінскім гарадскім судзе, але рашэнне было пакінута без зменаў.
Неўзабаве Алесь Мех атрымаў пастанову з аддзела прымусовага судовага выканання Кобрынскага раёна за подпісам Святланы Галашка. У пастанове паведамляецца, што ён павінен перавесці суму поўнасцю на рахунак Беларусбанка. Калі ён не выканае патрабавання, то будуць прыняты меры да прымусовага выканання з ускладаннем выдаткаў па выкананні і ўзбуджана адміністрацыйная справа па арт. 23.10 КаАП за невыкананне выканаўчых дакументаў. Штраф па якой да 50-ці базавых велічынь.
Алесь прыватны прадпрымальнік, у сувязі з крызісам прыбыткі ўпалі. Мае сям’ю і двух сыноў-студэнтаў. Таму патрабаванне сплаціць такую вялікую суму тэрмінова ў поўным аб’ёме лічыць ціскам на сябе.
