Наваполацк: рашэнне аб масавых мерапрыемствах неабходна прывесці ў адпаведнасць з заканадаўствам
Наваполацкі гарвыканкам. Фота: ximik.info
Грамадскія актывісты і праваабаронцы Полацка і Наваполацка правялі ў мінулыя выходныя круглы стол, каб абмеркаваць праблему неадпаведнасці рашэння гарвыканкама аб масавых мерапрыемствах дзеючаму заканадаўству. Згодна з рашэннем Наваполацкага гарадскога выканаўчага камітэта №858 ад 9 верасня 2011 года аплата расходаў, звязаных з аховай грамадскага парадку, медыцынскім абслугоўваннем, уборкай тэрыторыі пасля правядзення на ёй масавага мерапрыемства, робіцца арганiзатарам (арганiзатарамi) масавых мерапрыемстваў у адпаведнасці з дзеючым заканадаўствам і копіі дакументаў аб прадастаўленні гэтых паслуг накіроўваюцца ў гарвыканкам адначасова з заявай аб правядзенні масавага мерапрыемства. Аднак на практыцы ў міліцыі дамову падпісаць немагчыма да атрымання дазволу гарвыканкамам.
Праваабаронца Зміцер Салаўёў лічыць гэта не зусім слушным, паколькі заяўнікі і арганізатары масавых мерапрыемстваў не павінны загадзя, да атрымання дазволу на правядзенне мітынгу альбо пікету аплочваць паслугі па іх ахове і гэтае рашэнне Наваполацкага гарвыканкама супярэчыць пункту 5 Пастановы Савета міністраў №207:
“Мясцовы выканаўчы і распарадчы орган на працягу аднаго дня з моманту рэгістрацыі заявы аб правядзенні масавага мерапрыемства накіроўвае яго копію ў тэрытарыяльны орган унутраных спраў (далей - АУС) для разгляду пытанняў, звязаных з аховай грамадскага парадку і забеспячэннем грамадскай бяспекі, і выпрацоўкі адпаведных прапаноў”.
Не задавальняе праваабаронцаў і адсутнасць выбару месцаў для правядзення мітынгаў альбо пікетаў. Так, у Наваполацку адзіным пастаянным месцам для правядзення масавых мерапрыемстваў вызначаны гарадскі парк культуры і адпачынку, які больш нагадвае лес, чым месца масавага адпачынку.
Удзельнікі круглага стала вырашылі патрабаваць прывядзення ў адпаведнасць з дзеючым заканадаўствам рашэння мясцовага выканаўчага органу ўлады ў Наваполацку, а затым паспрабаваць гэта зрабіць і ў іншых гарадах. Яны падрыхтавалі і накіравалі ў Наваполацкі гарвыканкам адпаведную заяву аб неабходнасці ўнясення зменаў у рашэнне ад 9 верасня 2011 года.
Па словах Зміцера Салаўёва, раней праваабаронцы дамагліся ўнясення падобных зменаў у мясцовае заканадаўства аб масавых мерапрыемствах у некаторых гарадах, напрыклад, у Брэсце, зараз паспрабуць гэта зрабіць у іншых месцах.
