Cкончыўся чарговы тэрмін праверкі наконт збіцця Дабравольскага

Сёння ў чарговы раз скончыўся тэрмін, адведзены Следчаму камітэту на праверку з нагоды збіцця супрацоўнікамі міліцыі журналіста TUT.BY Паўла Дабравольскага.

Да 25 красавіка СК мусіў вызначыць, ці быў у дзеяннях міліцыянтаў склад крымінальнага злачынства і ці будзе заведзеная адпаведная справа. Праверка па гэтым факце падаўжалася ўжо два разы, аднак вынік пакуль невядомы.

– Зараз я зноў вымушаны чакаць іх пісьмовага рашэння, якое дойдзе да мяне па пошце не раней чым праз тры-чатыры дні, – кажа Павел Дабравольскі.

Прэс-служба ГА “БАЖ” самастойна звярнулася ў Следчы камітэт, аднак таксама атрымала адмову. Намеснік начальніка аддзела следчага ўпраўлення УСК па Мінску Сямён Піцко заявіў, што нічога не будзе паведамляць журналісцкай арганізацыі, бо яна не з’яўляецца зацікаўленым бокам у справе.

Сам Павел Дабравольскі, між тым, не губляе надзеі, што вінаватыя ў збіцці міліцыянты ўсё ж панясуць пакаранне і праверка скончыцца прыцягненнем іх да адказнасці.

25 студзеня ў пачатку судовага пасяджэння па “справе графіцістаў” моладзевыя актывісты разгарнулі расцяжку з надпісам “Не – палітычным пераследам”. Іх вывелі з залы суда і павялі па калідоры, дзе іх пачаў здымаць на відэа журналіст Павел Дабравольскі. Яго разам з актывістамі завялі ў пакой, збілі, пасля даставілі ў Фрунзенскі РУУС, склалі пратаколы аб адміністрацыйных правапарушэннях, а затым прысудзілі штрафы ў тым жа судзе Фрунзенскага раёна па арт. 17.1 (дробнае хуліганства) і арт. 23.34 (непадпарадкаванне законнаму патрабаванню службовай асобы) КаАП.