У Салігорску плануюцца антыкрызісны мітынг і пікет за канстытуцыйныя правы
Грамадскі актывіст з Салігорска Уладзімір Шыла
Актывіст БХД Уладзімір Шыла накіраваў у Салігорскі райвыканкам дзьве заявы на правядзенне мітынга і пікета ў беларускай сталіцы шахцёраў.
Абмеркаваць, хто вінаваты ў эканамічным крызісе ў Беларусі і запатрабаваць ад уладаў распрацоўкі антыкрызіснай праграмы Уладзімір Шыла плануе 7-га сакавіка на стадыёне “Будаўнік”. Актывіст “Беларускай Хрысціянскай Дэмакратыі” Уладзімір Шыла разлічвае, што ўдзел у мерапрыемства зможа прыняць каля 80 чалавек. Заявы на аказанне паслуг па ахове грамадскага парадку, прыборцы тэрыторыі і медычным абслугоўванні таксама былі накіраваныя ў адпаведныя ведамствы.
15 сакавіка праз правядзенне адмысловага пікета на Цэнтральнай плошчы горада спадар Шыла плануе нагадаць салігорцам пра Дзень Канстытуцыі і існаванне ў грамадзян канстытуцыйных правоў. Адпаведная заява была накіраваная ў Салігорскі райвыканкам некалькі дзён таму. Па словах актывіста, падтрымаць пікет за канстытуцыйныя правы гатовыя каля 20 чалавек.
