Бярозаўскія праваабаронцы збіраюцца адзначыць Дзень правоў чалавека пікетам
Бярозаўскія праваабаронцы падалі заяву на пікет у Бярозаўскі райвыканкам. Такую форму яны абралі, каб адзначыць 10 снежня Міжнародны дзень правоў чалавека і 67-ю гадавіну прыняцця Генеральнай Асамблей ААН Усеагульнай дэкларацыі правоў чалавека.
Мэта пікету: распаўсюд Усеагульнай дэкларацыі правоў чалавека, інфармаванне пра яе змест і садзеянне яе разуменню і павагі да яе, абмеркаванне стану з правамі чалавека ў Рэспубліцы Беларусь. Плануецца, што ў пікеце прымуць удзел 5 чалавек. Месца правядзення – уваход на гарадскі стадыён – месца, вызначанае ўладамі, час -- з 12 да 13 гадзін.
Праваабаронцы першым пунктам абавязацельства просяць улічыць, што прыборку, забеспячэнне аховы здароўя і бяспекі заяўнікі бяруць на сябе.
За апошнія 18 гадоў бярозаўскія ўлады далі дазвол на пікет толькі адзін раз – 27 ліпеня бягучага года.
