Беларускія валанцёры ў Харкаве аказвалі дапамогу жыхарам гарадка для бежанцаў
Модульны гарадок для бежанцаў
Валанцёры “Беларускай Праваабарончай Гуманітарнай Місіі ва Украіне” працягваюць сваю дзейнасць у Харкаве. 8 ліпеня яны азнаёміліся з функцыянаваннем модульнага гарадка для бежанцаў, які быў пабудаваны пры дапамозе спецыялістаў з Германіі.
Відавочна, тут пакуль не хапае расліннасці і вентылятараў. У гарадку каля 80 дамкоў, паўсюль гуляюць маленькія дзеткі. Гэты гарадок перадалі арганізацыі "Станцыя Харкаў", і цяпер іх валанцёры аказваюць там дапамогу.
Месцам дыслакацыі абраная бібліятэка, якая дзеліць пакой з пунктам выдачы. Хутка падвезлі рэчы ў вялікай колькасці і вазок для двайнят. Рэчы новыя, якія не апраналіся, з Англіі. Шмат дзіцячага, асабліва на немаўлятак. Падчас сартыроўкі пералічвалі рэчы, каб ведаць колькі каму і як размяркоўваць. Час праляцеў хутка і зрэшты ўсё было рассартыравана па ўзроставых катэгорыях. Кропка запрацуе яшчэ не хутка, шмат чаго трэба яшчэ рабіць там, але праца пайшла і гэта выдатна! У доміках гатуецца ежа і віруе жыццё. Некаторыя жыхары заводзяць жывёлак ( катоў, сабак). Стаіць добрая дзіцячая пляцоўка.
Таксама беларускія валанцёры прынялі ўдзел у круглым стале "Канстытуцыйная рэформа ва Ўкраіне: ключавыя пытанні", які зладзілі Харкаўскае юрыдычнае таварыства, Нацыянальная акадэмія прававых навук Украіны ды кафедра тэорыі дзяржавы і права Нацыянальнага юрыдычнага ўніверсітэту імя Яраслава Мудрага. Апроч мясцовых знаўцаў канстытуцыйнага права са сваім бачаннем праблемы выступілі і прадстаўнікі іншых рэгіёнаў Украіны - Кіева, Ужгарада і Адэсы. Узнімаліся пытанні рэформаў мясцовага самакіравання, дасягнення эфектыўнага і незалежнага правасуддзя, правоў чалавека. Найбольш востра закранаўся аспект дэцэнтралізацыі ў маючай адбыцца канстытуцыйнай рэформе, бо ва ўмовах ваеннай пагрозы і сепаратысцкіх памкненняў у некаторых рэгіёнах - гэта вельмі далікатнае пытанне.
Даведацца больш пра надзённую працу арганізацыі "Станцыя Харкаў" і беларускіх валанцёраў можна ў раздзеле “Праваабарончая Гуманітарная Місія ва Украіне” на нашым сайце, альбо на старонцы арганізацыі “Станцыя Харкаў” у Facebook
