Журналістаў-фрылансераў Алеся Дзянісава і Алеся Кіркевіча аштрафавалі на 20 базавых велічынь
Гродзенскія журналісты-фрылансеры Алесь Дзянісаў і Алесь Кіркевіч
22 красавіка ў судзе Ленінскга раёна Гродна быў завершаны разгляд адміністрацыйнай справы ў дачыненні да журналістаў-фрылансераў Алеся Дзянісава і Алеся Кіркевіча. Завяршэнне працэсу было нядоўгім. Суддзя Алена Пятрова зладзіла толькі прагляд матэрыялу, што быў паказаны на тэлеканале Белсат. Сюжэт, зняты Дзянісавым і Кіркевічам, быў паказаны праз тэлеканал Белсат у пачатку сакавіка і датычыў адкрыцця выставы слуцкіх паясоў у Беларускім дзяржаўным музеі гісторыі рэлігіі.
Пасля гэтага суддзя Пятрова абвесціла сваю пастанову – па абвінавачанні ў незаконным вырабе і распаўсюдзе інфармацыйнага матэрыялу (артыкул 22.9, частка 2 КаАП РБ) журналісты аштрафаваныя на 20 базавых велічынь кожны. Гэтую пастанову Дзянісаў і Кіркевіч маюць намер аспрэчыць у судзе касацыйнай інстанцыі.
