Прызначана дата разгляду касацыйнай скаргі па справе аб забароне ў Салігорску пікета да Дня правоў чалавека

Касацыйная скарга салігорскага праваабаронцы Леаніда Мархоткі аб забароне пікета да Дня правоў чалавека будзе разгледжана судовай калегіяй па грамадзянскіх справах Мінскага абласнога суда 12 сакавіка ў 10 гадзін.

Яўка бакоў у Мінскі абласны суд не з’яўляецца абавязковай. Аб магчымай прысутнасці на паседжанні прадстаўнікоў Салігорскага райвыканкаму і пракуратуры пакуль інфармацыя адсутнічае. Спадар Мархотка каначтковага рашэння аб сваім удзеле ў паседжанні таксама яшчэ не прыняў. У любым выпадку праваабаронца спадзяецца на справядлівы разгляд справы ў касацыйнай інстанцыі і па-ранейшаму гатовы да працягу змагання за права на свабоду мірных сходаў у Камітэце ААН па правах чалавека.