Брэст: прадстаўнікі дэмакратычнай грамадскасці ўшанавалі памяць ахвяраў палітычных рэпрэсій (фота)

29 кастрычніка сябры Беларускай сацыял-дэмакратычнай партыі (Грамада), актывісты грамадзянскай кампаніі “Гавары праўду” і праваабаронцы наведалі Трышынскія могілкі ў Брэсце, дзе ўсклалі кветкі да манумента ахвярам палітычных рэпрэсій.

Як адзначыў лідар брэсцкіх сацыял-дэмакратаў Ігар Маслоўскі, аналагічныя памятныя акцыі ў горадзе ладзяцца штогод, і кожны раз удзельнікі такіх мепрыемстваў узгадваюць, што ў ноч з 29 на 30 кастрычніка 1937 года ў мінскай турме НКУС было расстраляна больш за 100 беларускіх пісьменнікаў, навукоўцаў, дзяржаўных дзеячаў. “Усяго за савецкі перыяд палітычныя рэпрэсіі ў Беларусі закранулі каля мільёна чалавек, і гэтым дзеянням няма апраўдання, - зазначыў Маслоўскі. – Таму мы не павінны забываць пра ахвяраў тых змрочных часоў, калі нехочам, каб гэтыя падзеі калі-небудзь зноў паўтарыліся”. Увечары 29 кастрычніка да Дня памяці ахвяраў палітычных рэпрэсій было прымеркавана паседжанне тэматычнага “круглага стала” ў мясцовым офісе БСДП (Грамада).