FIDH і Праваабарончы цэнтр "Вясна" патрабуюць спынення пераследу грамадзянскага актывіста Паўла Вінаградава
Парыж - Мінск, 14 кастрычніка 2014 г.
Міжнародная Федэрацыя за правы чалавека (FIDH) і Праваабарончы цэнтр «Вясна» выказваюць пратэст і абурэнне з нагоды незаконных дзеянняў уладаў Беларусі ў дачыненні да апазіцыйнага актывіста Паўла Вінаградава.
9 кастрычніка 2014 г., напярэдадні саміту краін-удзельніц СНД і візіту ў Мінск прэзідэнта Расійскай Федэрацыі Уладзіміра Пуціна, апазіцыйны актывіст Павел Вінаградаў у чарговы раз быў падвергнуты прэвентыўнамуадвольнаму арышту тэрмінам на 15 сутак. Падставай для вынесенай судом абвінаваўчай пастановы пра арышт сталі паказанні супрацоўнікаў міліцыі пра нібыта хуліганскія дзеянні актывіста.
Варта адзначыць, што гэта далёка не першы выпадак адвольнага затрымання і арышту Паўла Вінаградава беларускімі праваахоўнымі органамі. Павел рэгулярна падвяргаецца падобным затрыманням і арыштам напярэдадні тых ці іншых грамадска-палітычных падзей у краіне. За 10 месяцаў бягучага года ён правёў у зняволенні ў агульнай складанасці 50 сутак. Акрамя таго, пасля вызвалення ў верасні 2011 г. з калоніі г. Івацэвічы, дзе Павел адбываў пакаранне ў выглядзе пазбаўлення волі за ўдзел у дэманстрацыі пратэсту пасля прэзідэнцкіх выбараў 19 снежня 2010 г., за ім устаноўлены прэвентыўны нагляд тэрмінам больш за два гады.
Па паведамленнях Паўла Вінаградава, яму рэгулярна пагражаюць крымінальным пераследам і фізічнай расправай з мэтай прымусіць яго спыніць мірную дзейнасць, накіраваную на выказванне свайго меркавання і пратэсту, а таксама пакінуць горад Мінск на час прэвентыўнага нагляду. Напярэдадні правядзення ў г. Мінску Чэмпіянату свету па хакеі ў красавіку 2014 г., у выніку аналагічных пагрозаў з боку супрацоўнікаў Маскоўскага РУУС г. Мінска, Павел быў вымушаны з’ехаць са сталіцы ў г. Беразіно. Гэты факт быў указаны ў сумесным дакладзе FIDН і Праваабарончага цэнтра "Вясна" па праблеме адвольных затрыманняў у Беларусі.
Варта адзначыць, што практыка адвольных затрыманняў шырока выкарыстоўваецца ўладамі Беларусі ў дачыненні да апазіцыйных актывістаў і набыла сістэмны і сістэматычны характар.
У сувязі з гэтым FIDH і Праваабарончы цэнтр "Вясна" заяўляюць наступнае:
Дзеянні ўладаў Беларусі ў дачыненні да Паўла Вінаградава носяць незаконны характар і маюць палітычны матыў, які мае на мэце недобраахвотнае спыненне або змяненне Паўлам Вінаградавым сваёй публічнай дзейнасці;
Пазбаўленне волі (адміністратыўны арышт на 15 сутак), а таксама папярэднія арышты былі ўжытыя ў дачыненні да Паўла Вінаградава выключна ў сувязі з яго палітычнымі перакананнямі;
Дадзеныя абставіны дазваляюць вызначыць Паўла Вінаградава, на перыяд яго ізаляцыі, як палітвязня.
У сувязі з гэтым FIDH і Праваабарончы цэнтр "Вясна" патрабуюць ад уладаў Беларусі:
Неадкладнага вызвалення Паўла Вінаградава і адмены ўсіх незаконных судовых пастаноў у дачыненні да яго;
Спынення практыкі адвольных затрыманняў і іншых формаў ціску і пераследу ў дачыненні да Паўла Вінаградава і іншых актывістаў апазіцыйных групаў і рухаў;
Вызвалення ўсіх палітвязняў, якія знаходзяцца ў турмах і папраўчых калоніях Беларусі;
Спынення практыкі пераследу іншадумцаў у Беларусі як неабходнай умовы для нармалізацыі сітуацыі з правамі чалавека ў краіне.
