Баранавічы: 24 верасня суд разгледзіць грамадзянскую справу Мікалая Чарнавуса аб абароне гонару і годнасці

Індывідуальны прадпрымальнік Мікалай Чарнавус атрымаў позву з суда Баранавіцкага раёна і г. Баранавічы, у якой паведамляецца, што гарадскі суд 24 верасня разгледзіць яго зыскавую заяву на дзеянні намесніка начальніка гарадскога аддзела ўнутраных спраў падпалкоўніка Эльдара Вільчкоўскага. На думку Мікалая Чарнавуса, супрацоўнік міліцыі распаўсюдзіў ілжывыя звесткі, што падчас затрымання ў пасля несанкцыянаванага страйку баранавіцкіх прадпрымальнікаў 2 ліпеня грамадскі актывіст сімуляваў пагаршэнне свайго стану здароўя.

– Буду прасіць, каб гарадскі суд абавязаў падпалкоўніка Эльдара Вільчкоўскага абвергнуць ілжывыя і не адпавядаючыя рэчаіснасці звесткі шляхам прынясення вуснага і пісьмовага прабачэння, – пракаментаваў Мікалай Чарнавус.

Разгляд справы адбудзецца 24 верасня а 11-ай гадзіне ў памяшканні суда Баранавіцкага раёна і г. Баранавічы адрасе: вул. Гагарына, д. 6, кабінет 214.