Міліцыя прызнала невінаватымі жыхара Гомеля, які напаў на дом Кастуся Жукоўскага з-за ўкраінскага сцягу на даху
Цэнтральны РАУС Гомеля вынес чарговую пастанову аб адмове ва ўзбуджэнні крымінальнай справы па факту нападу на дом грамадскага актывіста Кастуся Жукоўскага. Нагадаем, 2 траўня на яго дом напалі невядомыя, візуальна п'яныя, з-за ўзнятага ў знак салідарнасці з брацкім народам украінскага сцягу. Адзін з нападнікаў лаяўся матам, абражаў гаспадара дома, пагражаў яму фізічнай расправай, а таксама называў украінскі сцяг «анучай». «Крычаў ён пра «фашыстаў-бандэраўцаў», «дзяды ваявалі», абражаў украінскія і беларускія ўлады і кідаўся ў бойку, пагражаў мяне забіць. Потым зламаў замок у брамцы, бо вельмі намагаўся прарвацца ў мой двор, каб «разабрацца» са мной», - патлумачыў Кастусь Жукоўскі. Ён выклікаў міліцыю. Нават пры з'яўленні міліцыі п'яная кампанія працягвала несці лухту з бруднай лаянкай пра «фашыстаў» і «бандэраўцаў». «Міліцыянты не рэагавалі, нягледзячы на мае патрабаванні прыняць меры да парушальнікаў парадку, затрымаць іх і пачаць следчыя дзеянні. Потым міліцыянты паведамілі мне, што паедзем усе разам у аддзел, на маё патрабаванне зняць адбіткі ботаў з брамкі, апісаць адзенне і абутак злачынцы, каб было прасцей даказаць віну нападнікаў – міліцыянт сказаў мне, маўляў, ідзіце дахаты і не правакуйце», - дадаў актывіст.
3 траўня ён падаў заяву ў Цэнтральны РАУС Гомеля, дзе прасіў прыцягнуць вінаватых да адказнасці. Ужо 8 траўня Цэнтральны РАУС вынес пастанову аб адмове ў узбуджэнні крымінальнай справы. Кастусь Жукоўскі падаў скаргу ў пракуратуру Гомеля. Пракуратура 16 чэрвеня адмяніла пастанову міліцыі і запатрабавала аднаўлення праверкі, паставіўшы перад міліцыяй шэраг пытанняў, патрабуючых адказаў. Тым не менш, днямі актывіст зноў атрымаў адказ з Цэнтральнага РАУС, што ў дзеяннях нападніка на яго дом няма складу ні злачынства, ні адміністрацыйнага правапарушэння. Да такіх высноваў прыйшла міліцыя, апытаўшы жыхара абласнога цэнтру, які напаў на дом. Так, грамадзянін даў такія паказанні: 2 траўня гуляў па вуліцы Кніжнай, убачыў на адным з дамоў бел-чырвона-белы і жоўта-блакітны сцяг. Вырашыў спытаць у гаспадара дома: з якой мэтай той вывесіў такія сцягі? Таму ветліва пастукаў у брамку і задаў сваё пытанне. Брудна не лаяўся, гаспадара дома не абражаў, брамку не ламаў, толькі сказаў, што «ганарыцца тым, што жыве ў Беларусі».
Кастусь Жукоўскі мае намер звярнуцца да прэзідэнта Украіны Пятра Парашэнкі – каб прасіць дапамагчы прыцягнуць да адказнасці злачынцаў, якія здзекуюцца з украінскіх нацыянальных сімвалаў, а людзей за падтрымку ўкраінскага народа ў цяжкі для іх час абзываюць фашыстамі і нацыстамі. «Мой выпадак, ды і іншыя падобныя ў Беларусі сведчаць, што словы аб падтрымцы Украіны з боку беларускіх чыноўнікаў разыходзяцца са справамі», - рэзюмаваў актывіст.
