Магілёў: Тацяну Буланаву аштрафавалі на 155 тысяч рублёў
Учора Адміністрацыйная камісія Ленінскага райвыканкаму Магілёва аштрафавала на 155 тысяч рублёў моладзевую актывістку Тацяну Буланаву. Камісія прызнала яе вінаватай у парушэньні правілаў упарадкаваньня і ўтрыманьня тэрыторыяў гораду, паведамляе Радыё Свабода.
Тацяна Буланава з рашэньнем адміністрацыйнай камісіі ня згодная і будзе яго абскарджваць:
“Ніводнага паказаньня не было менавіта на тое, што я насамрэч нешта зрабіла. Усё гэта сфабрыкавана. Мне падаецца, што яны вырашылі даць мне штраф — і яны далі мне яго. Даўно было вырашана, колькі мне даць, і ці даць мне яго наагул”.
У ноч з 16 на 17 красавіка Тацяну Буланаву разам з Максімам Азаравым затрымаў міліцэйскі патруль. Іх абвінавацілі ў распаўсюдзе ўлётак “Свабоду Дашкевічу”.
У пастарунку Буланава і Азараў прабылі да пяці гадзінаў раніцы. Потым іх адпусьцілі.
