У брэсцкі офіс сацыял-дэмакратаў прыйшлі міліцыянты
На кіраўніка абласной арганізацыі Ігара Маслоўскага яны склалі пратакол апытання.
Як паведаміў у каментары Еўрарадыё Ігар Маслоўскі, праваахоўнікаў цікавіла, як партыйцы святкавалі Міжнародны дзень салідарнасці рабочых.
Маслоўскі: "Супрацоўнік міліцыі запытаў асабіста мяне і папрасіў даць тлумачэнні наконт дзеянняў сябраў партыі падчас 1 траўня. Гэта было звязана з нейкай праверкай, якая, як я разумею, была ініцыянаваная ўнутры міліцэйскай структуры".
Як інфармавала Еўрарадыё, брэсцкія ўлады не дазволілі сябрам БСДП правесці 1 траўня арганізаваны мітынг з сацыяльна-эканамічнымі патрабаваннямі. Аднак каля 20 актывістаў адзначылі Першамай шэсцем па горадзе пад нацыянальнай сімволікай. Апроч гэтага эсдэкі правялі на вуліцах гораду інфармацыйную кампанію сярод брэстаўчан — распаўсюдзілі партыйныя ўлёткі.
Cа словаў Ігара Маслоўскага, ён не бачыць складу правапарушэння ў дзеяннях сваіх аднапартыйцаў.
