Паўла Селюна расстралялі 17 красавіка
Фота з дакументаў Паўла Селюна
Сёння стала вядома дата расстрэлу 23-гадовага студэнта гістфаку БДУ, абвінавачанага ў забойстве двух асоб з асаблівай жорсткасцю. Маці асуджанага атрымала пасведчанне аб смерці.
18 красавіка адвакат Паўла Селюна з’явілася на спатканне з падабаронным у СІЗА на Валадарскага. Там ёй паведамілі, што Селюн «убыл по приговору», што на звычайнай мове значыць расстрэл. Аднак афіцыйных дакументаў, які б гэта пацверджвалі, ні абаронцу, ні сваякам Паўла не дасылалі.
8 мая маці асуджанага Тамара Сялюн звярнулася за тлумачэннямі ў СІЗА, адтуль яе накіравалі ў Вярхоўны суд. На асабістым прыёме намеснік старшыні ВС Валер Калінковіч пацвердзіў: прысуд прыведзены ў выкананне.
“Вас павінен праінфармаваць Гродзенскі абласны суд, - сказаў Калінковіч маці забітага. – Калі яны гэтага не зрабілі, вінаватыя будуць прыцягнутыя да адказнасці. Але паверце, у самы бліжэйшы час яны накіруюць вам дакументы”.
І сапраўды, на гэтым тыдні Тамара Сялюн атрымала дакументы з Гродзенскага абласнога суда, датаваныя 8 мая. Відаць, без указанняў зверху абласны суд не мог справіцца са сваімі абавязкамі – паведаміць пра выкананне прысуда ў час.
Сёння маці Паўла Селюна атрымала пасведчанне аб смерці сына ў Вілейскім ЗАГСе. Дата смерці – 17 красавіка. Прычына – “невядомая”. Раней, па словах праваабаронцы Андрэя Палуды, у пасведчаннях расстраляных у графе “прычына смерці” ставілі проста прочырк.
Маці таксама вярнулі асабістыя рэчы Паўла - яго вопратку і турэмную адзежу. Дзённікі, якія студэнт вёў падчас знаходжання ў СІЗА на Валадарскага, не выдалі.
Нагадаем, 12 чэрвеня 2013 Гродзенскі абласны суд прызнаў Паўла Селюна вінаватым па чатырох артыкулах Крымінальнага кодэкса: забойства дзвюх асоб, учыненае з асаблівай жорсткасцю; крадзёж; здзек над трупамі; крадзёж асабістых дакументаў. Да гэтага малады чалавек не меў судзімасцяў. Свае дзеянні ён патлумачыў рэўнасцю – забітыя – ягоная жонка і яе каханак, якіх ён застаў у адной кватэры.
Па сукупнасці злачынстваў суд першай інстанцыі прыгаварыў Паўла да выключнай меры пакарання - расстрэлу. Працэс вёў суддзя Анатоль Заяц. Сялюн падаў касацыйную скаргу на прысуд. 17 верасня 2013 яе разглядала судовая калегія Вярхоўнага суда пад старшынствам Валера Калінковіча. Вызначэнне - пакінуць прысуд у сіле.
Паўла Селюна расстралялі, калі ягоны зварот знаходзіўся на разглядзе ў Камітэце па правах чалавека ААН. Гэта з’яўляецца прамым парушэннем міжнародных нормаў, якія ўзяла на сябе Рэспубліка Беларусь (п. 92 Правілаў працэдур).
Праваабаронцы мяркуюць, што разам з Селюном маглі выканаць прысуд і ў адносінах да Рыгора Юзэпчука.
«Былы начальнік мінскага СІЗА №1 Алег Алкаеў расказваў, што расстрэльная каманда звычайна збіраецца для выканання адразу некалькі прысудаў. Таму Рыгора Юзэпчука маглі забіць разам з Паўлам Селюном», —гаворыць Палуда.
Магілёўскі абласны суд адмовіўся прадаставіць звесткі пра дату расстрэла Юзэпчука, спаслаўшыся на тое, што Міністэрствам унутраных спраў дадзеная інфармацыя аднесена да графу “толькі для службовага карыстання”.
