У Магілёве падчас агульнагарадскога суботніка пашкодзілі гістарычны будынак
Гэта сцярджае старшыня Магілёўскага абласнога Таварыства аховы помнікаў Уладзімір Краўчанка. З гэтай нагоды гісторык і правааабронца рыхтуе скаргі ў Магілёўскую гарадскую пракуратуру і Міністэрства культуры Рэспублікі Беларусь.
“Уся тэрыторыя ўздоўж высокага берага Дняпра ад ракі Дзебра (па леваму берагу) да Дубравенкі з’яўляецца гістарычным помнікам. Гэта месца старога горада. Гэтая тэрыторыя ахоўваецца законам”, - кажа Уладзімір Краўчанка.
Са слоў кіраўніка Магілёўскага абласнога Таварыства аховы помнікаў, падчас суботніка грамадзяне, якія прыбіралі тэрыторыю былога Школішча, пашкодзілі падмурак будынка 18 стагоддзя.
“Ідэя зрабіць парк на гэтым месцы – гэта цудоўна, аднак не трэба гэта рабіць вандалаўскім метадам. Падмурак быў прыхаваны зямлёй і ўзвышаўся над агульным ландшафтам. Удзельнікі суботніка вырашылі яго зраўняць і ў выніку пашкодзілі скляпенне і падмурак гістарычнага будынка”, - кажа Уладзімір Краўчанка.
У якасці аргумента ён прыводзіць тое, што цэгла падмурка самаробная, клалася з выкарыстаннем вапны, а не цэмента, а на цэглах прысутнічаюць адбіткі чалавечых пальцаў, што сведчыць, што яны вырабляліся не прамысловым метадам, які быў распаўсюджаны ў 18 стагоддзі.
“Зараз на Школішчы стаяць паўразбуранымі чатыры дамы. Яны датуюцца канцом 19 – пачаткам 20 стагоддзя. Яны даволі трывалыя і іх можна яшчэ прывесці ў парадак. Аднак, кіраўніцтва горада плануе іх знесці. На гэтым месцы таксама шмат падмуркаў іншых дамоў, якія застаюцца недаследаванымі”, - адзначае Краўчанка.
У сваіх скаргах старшыня Магілёўскага абласнога Таварыства аховы помнікаў будзе звяртаць таксама ўвагу на бесгаспадарчасць чыноўнікаў. Паводле яго слоў, будынкі можна захаваць і мэтава скарыстаць.
Нагадаем, што 29 сакавіка ў Магілёве адбыўся агульнагарадскі суботнік. У ім прыняла ўдзел каля 800 чалавек і 50 адзінак тэхнікі. Кіраўнік Магілёўскага гарвыканкама Уладзімір Цумараў распарадзіўся, каб на месцы Падміколля і раёна былога Школішча паўстаў гарадскі парк. Зялёныя зоны былі замацаваны і размеркаваны паміж рознымі прадпрыемствамі горада.
