Алесь Бяляцкі: “…выходзяць пытанні ведання гісторыі і мовы ў народзе, людзьмі – на першы план”
Бялыніцкі журналіст Барыс Вырвіч 16 красавіка атрымаў ліст ад палітвязня, кіраўніка Праваабарончага цэнтра “Вясна” Алеся Бяляцкага, у якім Алесь распавёў пра тое, што яго зараз найбольш хвалюе.
Свой ліст Алесь Бяляцкі напісаў і адласлаў з папраўчай калоніі №2 у Бабруйску 13 красавіка.
У прыватнасці, палітвязень піша: “За гэты час невялікі багата што на поўдні ад нас і на ўсходзе змянілася, і гэта яшчэ не мяжа. Так што ўсе мае думкі пра гэта і пра тое, якім чынам гэта будзе ўплываць на нас. Вось і выходзяць пытанні ведання гісторыі і мовы ў народзе, людзьмі – на першы план, а асьветніцкая праца моцна карэктуе і ўплывае на светапогляд. Тое, што, урэшце, заўсёды было, але зараз стала практычна зразумелым”.
Таксама ў лісце палітвязень распавядае пра сваё жыццё ў папраўчай калоніі ў Бабруйску, піша, што “птушкі ўжо прыляцелі, як з поўдню, так і з усходу J” і віншуе бялынічан з Вялікаднем.
Па словах Барыса Вырвіча, якраз сёння грамадскія актывісты Бялыніцкага раёна даслалі ўсім беларускім палітвязням віншавальныя паштоўкі з Вялікоднымі святамі, у якіх выказалі ім сваю падтрымку і найлепшыя пажаданні.
