З Баранавічаў палітвязням накіраваны віншаванні з Вялікаднем

Баранавіцкія актывісты 15 красавіка адправілі каляровыя віншавальныя паштоўкі з Вялікаднем палітвязням Мікалаю Статкевічу, Алесю Бяляцкаму, Эдуарду Лобаву, Мікалаю Дзядку, Ігару Аліневічу, Яўгену Васьковічу, Арцёму Пракапенку, Андрэю Гайдукову і Васілю Парфянкову.

У сваіх паштоўках праваабаронцы, актывісты Руху “За свабоду”, Аб’яднанай грамадзянскай партыі, кампаніі “Гавары праўду” пажадалі палітвязням моцнага здароўя, аптымізму, шчасця, веры ў лепшую будучыню і надзеі, што “халоднае крыло радзімы” заўсёды саступіць цяплу сяброўскіх сэрцаў.

– Мы рэгулярна дасылаем і атрымліваем лісты і паштоўкі ад Мікалая Статкевіча, Алеся Бяляцкага, Мікалая Дзядка і іншых. У сваіх пасланнях мы распавядаем пра грамадска-палітычнае жыццё ў Баранавічах і заўсёды выказваем спадзяванне, што з Божай ласкай беларускія палітвязні вытрымаюць усе жыццёвыя выпрабаванні і мужна пераадоляць турэмныя цяжкасці, – адзначыла Анжаліка Камбалава.