Прысуды ўдзельнікам акцыі пратэсту: 3-5 сутак

У судзе Цэнтральнага раёну Менску праходзяць суды над удзельнікамі акцыі пратэсту супраць скасаваньня льготаў - Паўлам Чумаковым, Вадзімам Баравіком, Аляксандрам Барадзенкам, Паўлам Вільтоўскім і Паўлам Маркевічам.

Паўла Вінаградава асудзілі на пяць сутак. Паўла Маркевіча і Аляксандра Баравенку - на трое сутак, сёньня пасьля 20.00 яны ўжо выйдуць на волю. Судзьдзя Тацяна Паўлючук пачала разглядаць справу студэнта БДУ Паўла Чумакова.

1 чэрвеня спэцназ міліцыі жорстка разагнаў шэсьце-пэрформанс студэнтаў супраць скасаваньня льготаў.

У акцыі, што адбылася ў цэнтры Менску, удзельнічала блізу сотні чалавек. Яны трымалі на руках труну з надпісам "Ільготы". У чорнай рамцы студэнты несьлі таксама вялікі квіток для праезду ў грамадзкім транспарце. Такім чынам маладыя людзі пратэставалі супраць скасаваньня льготаў.

Міліцыя затрымала шасьцярых удзельнікаў акцыі. Пазьней студэнтаў завезьлі ў турму на Акрэсьціна, паведамляе Радыё Свабода.