Вадзіма Саранчукова пазбавілі кандыдацкага статусу
Старшыня Гродзенскай гарадской арганізацыі Партыі БНФ Вадзім Саранчукоў
Адзінага кандыдата ў дэпутаты Гродзенскага гарсавету ад Партыі БНФ Вадзіма Саранчукова гарадская выбарчая камісія “зняла” з выбарчага працэсу. Пра гэта Саранчукову паведамілі на чарговым пасяджэнні гарадской камісіі. Абсурд сітуацыі ў тым, што камісія, якая зарэгістравала яго кандыдатам, постфактум нібыта выявіла парушэнні ў дэкларацыі пра даходы і маёмасць, складзенай кандыдатам. Цікава, што ў ранейшых выбарчых кампаніях Саранчукоў запаўняў такую дэкларацыю аналагічна, і раней да гэтага прэтэнзій не было.
Вадзім Саранчукоў ужо надрукаваў некаторыя свае агітацыйныя матэрыялы. Зараз невядома, што будзе і з агульнымі інфармацыйнымі выбарчымі матэрыяламі, якія паводле закону ўжо мусілі быць надрукаваныя.
Вадзім Саранчукоў у бліжэйшыя тры дні аспрэчыць рашэнне гарадской выбарчай камісіі ў абласной тэрытарыяльнай камісіі. Пакуль ён не здае сваё пасведчанне кандыдата ў дэпутаты.
“Праваабаронцы за свабодныя выбары”
