Праваабарончая праграма “Людзьмі звацца!” на Беларускім Радыё Рацыя
Кожны аўторак у 15:05 ў эфіры незалежнай беларускай радыёстанцыі “Беларускае Радыё Рацыя”- праграма “Людзьмі звацца!”, якая асвятляе падзеі, датычныя правоў чалавека на Беларусі. Праграма складаецца з рубрык “Хроніка пераследу”, “Падзея тыдня”, “Асоба. Дзяржава. Грамадства” ды “Навіны палітвязняў”.
Анонс выпуску:
“Хроніка пераследу”: адміністратыўны пераслед актывітсаў "Маладога фронту", суд над тэлеканалам "Белсат" і крымінальная справа супраць міліцыянта з Крычава, які выбіваў з падазраванага ільжывыя паказанні.
"Падзея тыдня": Дзяржаўны мытны камітэт Беларусі прызначыў паўторную экспертызу кнігі літаратуразнаўчых артыкулаў Алеся Бяляцкага “Асьвечаныя Беларушчынай”. Тым часам праваабаронца Таццяна Рэвяка, у якой выданне было сканфіскавана на беларуска-літоўскай мяжы, падрыхтавала новую скаргу ў мытны камітэт.
"Асоба. Дзяржава. Грамадства": лаўрэат прэміі імя Алеся Адамовіча, вядомы журналіст Аляксандр Тамковіч рыхтуецца да прэзентацыі сваёй новай, дваццатай па ліку, кнігі "Найноўшая гісторыя ў асобах" і адначасова прымае віншаванні - 9 лістапада ён адзначыў свой паўвекавы юбілей.
“Навіны палітвязняў”: старшыня Праваабарончага цэнтру “Вясна” Алесь Бяляцкі адбыў за кратамі палову тэрміну зняволення і ў лістах да сваіх блізкіх ды знаёмых распавядае пра гэты няпросты ў жыцці час; на палітзняволеных Мікалая Статкевіча і Арцёма Пракапенку працягваецца ціск з боку адміністрацыі папраўчых устаноў.
У музычных паўзах - песні гурта “Яnkey”.
