Юрыя Рубцова судзяць за “непадпарадкаванне” міліцыі
Юрый Рубцоў, удзельнік "Дзядоў-2013"
4 лістапада актывіст апазіцыі Юрый Рубцоў, затрыманы ўдзельнік учорашняй акцыі “Дзяды”, дастаўлены ў суд Савецкага раёна Мінска. Яго абвінавачваюць паводле артыкула 23.4 КаАП РБ.
Жыхар Гомеля 3-га лістапада браў удзел у мірным шэсці “Дзяды”. Ён быў апрануты ў майку з надпісам “Лукашенко, уходи”, і яшчэ напачатку акцыі супрацоўнікі міліцыі папярэджвалі, каб ён зняў гэтую майку. Затрыманне актывіста адбылося ўжо пасля мітынгу ў Курапатах. У раёне дыспетчарскай станцыі “Карбышава” два міліцыянеры схапілі Рубцова і без тлумачэння прычынаў, заламіўшы рукі, запіхнулі яго ў мікрааўтобус. Затрыманы быў дастаўлены ў міліцэйскі пастарунак па вуліцы Карбышава.
У пратаколе, складзеным на Юрыя Рубцова, ён абвінавачваецца ў непадпарадкаванні супрацоўнікам міліцыі – напэўна так апошнія кваліфікавалі нежаданне актывіста зняць майку. "Непадпарадкаванне" паводле арт. 23.4 КаАП цягне накладанне штрафу ў памеры ад дваццаці да пяцідзесяці базавых велічынь або адміністратыўны арышт.
