Рэчыцкія прадпрымальнікі атрымалі адказ з Адміністрацыі прэзідэнта
Рэчыцкія прадпрымальнікі, якія планавалі бестэрміновы страйк з 1 жніўня, атрымалі адказ з Адміністрацыі прэзідэнта на раней адрасаваны зварот.
У лісце зазначаецца, што зварот прадпрымальнікаў быў перанапраўлены ў Гомельскі аблвыканкам.
–У сваім звароце мы пазначылі, што тэхрэгламент уступае ў супярэчнасці з іншымі заканадаўчымі актамі, – кажа рэчыцкі прадпрымальнік Алег Шабетнік. – Напрыклад, пастанова Дзяржстандарту і Міністэрства гандлю ўстанавіла жорсткія адміністрацыйныя бар'еры для іпэшнікаў. У прыватнасці, з 1 ліпеня, згодна з дадзенай пастановы, прадпрымальнікі павінны мець суправаджальныя дакументы на тавар. Аднак, згодна з Падатковым кодэксам, прадпрымальнік, які выплаціў двайную стаўку адзінага падатку, мае права рэалізоўваць свой тавар без дакументаў.
Акрамя таго, прадпрымальнікі адрасавалі звароты ў розныя інстанцыі, каб спецыялісты далі тлумачынні наконт акрэсленых супярэчнасцей.
–Гэтымі днямі ў Маскве праходзіць канферэнцыя, якая прасвечана пытанням тэхрэгламента Мытнага саюза, – кажа Алег Шабетнік. – Мы вырашылі не чакаць адказу ад чыноўнікаў, а адправіць свайго прадстаўніка на гэтую канферэнцыю, каб у Маскве пачулі не толькі пазіцыю афіцыйнага Мінска, але і непасрэдна тых, хто займаецца прадпрымальніцтвам.
