Напад у Кіеве на акцыю салідарнасьці зь беларускімі палітвязьнямі

У Кіеве ў Марыінскім парку, дзе ўчора адзначаўся Міжнародны дзень салідарнасьці з грамадзянскай супольнасьцю Беларусі, невядомыя ў масках зрывалі фотаздымкі з выявамі беларускіх акцый пратэсту і патрабаваньняў вызваліць палітвязьняў.

Пакуль невядомыя зрывалі фотаздымкі, малады чалавек, які назваўся Юрыем Клейносам, крычаў у гукаўзмацняльнік, што дзеяньні арганізатараў выставы накіраваны на разбурэньне адносінаў Украіны і Беларусі. Разам з тым ён заявіў, што ня ведае маладых людзей у масках і што яны проста прыйшлі зь ім.

«Прастора свабоднай Беларусі» — акцыя да Міжнароднага дня салідарнасьці з грамадзянскай супольнасьцю Беларусі, у якой, у прыватнасьці, бралі ўдзел «Цэнтар грамадзянскіх свабодаў», Amnesty International ва Ўкраіне і Міжнародны фэстываль дакумэнтальнага кіно аб правах чалавека.

Міжнародны дзень салідарнасьці з грамадзянскай супольнасьцю Беларусі ўпершыню адзначаўся летась у гадавіну пазбаўленьня волі беларускага праваабаронцы Алеся Бяляцкага.