Віктар Сырыца скардзіцца ў Мінюст на суддзю
Кіраўнік Баранавіцкай суполкі ТБМ і актывіст Руху “За свабоду” Віктар Сырыца накіраваў скаргу ў Мінюст на суддзю Кацярыну Груда. Ён лічыць, што суддзя парушыла яго канстытуцыйныя правы, калі не прыняла хадайніцтва актывіста весці яго судовы працэс на беларускай мове. Суддзя адхіліла хадайніцтва, сказаўшы, што у Беларусі дзве дзяржаўныя мовы: беларуская і руская, і яна будзе карыстацца рускай.
Нагадаем, што 1 жніўня суддзя суда г. Баранавічы і Баранавіцкага раёна Кацярына Груда вынесла пастанову аб штрафе ў памеры 20 базавых велічынь Віктару Сырыцы. Актывіст быў абвінавачаны ў парушэнні арт.23.34 Адміністрацыйнага кодэкса РБ – арганізацыі і правядзенні несанкцыянаванага мерапрыемства, прысвечанага 150-тым угодкам бітвы пад Мілавідамі паўстанцаў Каліноўскага.
