Заяўка на пікет да другой гадавіны арышту Алеся Бяляцкага пададзена ў Бярозе
Алесь Бяляцкі
Праваабаронцы Сяржук Русецкі, Тамара Шчапёткіна, а таксама грамадская актывістка Таццяна Тарасевіч падалі заяўку на пікет на 4 жніўня ў Бярозаўскі райвыканкам. Заяўнікі плануюць правесці пікет ад 16 да 17 гадзін у адведзеным уладамі месцы – на гарадскім стадыёне. Удзел у пікеце плануецца да 10 чалавек.
Папярэдне актывісты паспрабавалі скласці дамовы з міліцыяй, ЖКГ і бальніцай. У міліцыі паведамілі, што па дамоўленасці з райвыканкамам дамова будзе складзена, калі ў райвыканкаме скажуць, што гэта патрэбна. Жыллёва-камунальная гаспадарка паабяцала скласці дамову ў панядзелак 22 ліпеня. У бальніцы галоўнага ўрача з 16 гадзін не было на месцы, яна адлучылася. І сакратар сказала, што пытанне можа быць разгледжана ў панядзелак.
Мэта пікету – нагадаць бярозаўчанам пра несправядлівы прысуд кіраўніку Праваабарончага цэнтра “Вясна” Алесю Бяляцкаму і прыцягнуць увагу грамадскасці на наяўнасць палізняволеных у Беларусі.
