У Баранавічах пададзена заява на пікет ў падтрымку Бяляцкага і ўсіх палітвязняў

19 ліпеня ў Баранавіцкі гарвыканкам пададзена заява на правядзенне 4 жніўня ў цэнтры горада (плошча Леніна, ля фантана) інфармацыйнага пікету ў падтрымку палітычна зняволенага праваабаронцы Алеся Бяляцкага, які ўжо 2 гады знаходзіцца ў турме.

Арганізатарамі мерапрыемства выступаюць праваабаронца Сяргей Гоўша і грамадскі актывіст Віктар Сырыца. Гэтае інфармацыйнае мерапрыемства запланавана з мэтаю звярнуць увагу грамадскасці на праблему палітычных вязняў у нашай краіне, якіх сёння налічваецца 12 чалавек.

 – Сваім пікетам мы хочам падкрэсліць, што ў Беларусілюдзей караюць за палітычныя погляды. А яшчэ мы хочам маральна падтрымаць не толькі Алеся Бяляцкага, але і ўсіх палітвязняў, якіх, як мы лічым, асудзілі незаконна, – заявіў праваабаронца Сяргей Гоўша.

Ён таксама адзначыў, што акцыя ў падтрымку Алеся Бяляцкага – агульнарэспубліканская і праводзіцца па ініцыятыве праваабаронцаў.

Папярэднія дзве заявы на пікеты ў падтрымку Алеся Бяляцкага ў 2012 годзе Баранавіцкі гарвыканкам не задаволіў.