У Эўрапарлямэнце абмеркавалі справаздачу Палецкіса
Абмеркаваньне справаздачы па Беларусі 30 траўня на пасяджэньні Камітэту
замежных спраў Эўрапарлямэнту ў Брусэлі было гарачым і эмацыйным. Пра
гэта паведаміў БелаПАН аўтар
справаздачы Юстас Палецкіс.
«Я чакаў гарачай і эмацыйнай дыскусіі пры абмеркаваньні дакладу. Так
і было», — сказаў Палецкіс.
Нагадаем, даклад быў падрыхтаваны для Эўракамісіі, Рады ЭЗ і Службы
зьнешніх дзеяньняў Эўракамісіі па выніках візыту Юстаса Палецкіса
ў Менск 18–21 сакавіка і выклікаў неадназначную рэакцыю
ў Беларусі. Прадстаўнікі апазыцыі і праваабаронцы абурыліся, што
ў ім сказана пра паляпшэньне сытуацыі з правамі чалавека
ў краіне ў 2012 годзе. Палецкіс, у сваю чаргу, сьцьвярджаў,
што такую выснову ён зрабіў на падставе інфармацыі беларускіх
праваабаронцаў. Падчас онлайн-канфэрэнцыі на сайце Радыё Свабода
24 траўня Палецкіс прызнаў: фармулёўка пра «паляпшэньне сытуацыі
з правамі чалавека» ў справаздачы няўдалая і будзе зьменена.
У ходзе сёньняшняга абмеркаваньня прагучала шмат крытыкі з нагоды
дадзенай фармулёўкі, распавёў Палецкіс.
«Я ўжо казаў, што гэтая фармулёўка атрымалася няўдалай і будзе
зьмененая», — адзначыў ён. Эўрадэпутат нагадаў, што выснову
аб паляпшэньні сытуацыі ён зрабіў на падставе зьвестак,
апублікаваных на праваабарончым сайце www.spring96.org, дзе паведамлялася:
у 2012 годзе ў Беларусі было зафіксавана ў тры разы менш
рэпрэсій, арыштаў, затрыманьняў, ператрусаў, чым у 2011-м.
У той жа час фраза праваабаронцаў аб тым, што «атмасфэра
запалоханасьці зьнізіла актыўнасьць грамадзянаў» у папярэдні варыянт
дакладу ня трапіла «з-за неабходнасьці скарачаць» тэкст дакумэнту,
патлумачыў Палецкіс.
«Самым важным і пазытыўным у сёньняшнім абмеркаваньні я лічу
тое, што, мабыць, упершыню за дзевяць гадоў у Эўрапарлямэнце прайшла
дыскусія не як рэакцыя на нейкія дрэнныя навіны
зь Беларусі, а як абмеркаваньне шляхоў вырашэньня праблемы,
спроба стратэгічна паглядзець на ўсю карціну цалкам», — сказаў
спэцдакладчык, падкрэсьліўшы, што Эўрапарлямэнт заўсёды вельмі адчувальна
ставіўся да праблемаў з дэмакратыяй і парушэньнем правоў
чалавека.
На пасяджэньні камітэту Палецкіс яшчэ раз зьвярнуў увагу на тое, што
ў падрыхтаваным ім дакладзе не гаворыцца аб зьняцьці
санкцыяў з афіцыйных прадстаўнікоў Беларусі. «У тэксьце гаворыцца пра
магчымасьць разгляду пытаньня аб зьняцьці візавых абмежаваньняў
з аднаго-двух чыноўнікаў, якія маглі б паспрыяць наладжваньню дыялёгу
паміж Беларусьсю і ЭЗ», — адзначыў эўрадэпутат.
На працягу наступнага тыдня ў даклад па Беларусі можна будзе
ўносіць праўкі. Як паведаміў Палецкіс, у яго заплянаваны шэраг
сустрэч з калегамі з Эўрапарлямэнту, на якіх будуць
абмяркоўвацца папраўкі і дапаўненьні да дакумэнту.
Спэцдакладчык таксама паведаміў, што ўжо атрымаў папраўкі да дакладу
ад кіраўніка беларускага Цэнтру прававой трансфармацыі Алены Танкачовай.
«Я пасьпеў азнаёміцца з гэтымі матэрыяламі да пачатку
пасяджэньня. Танкачова даслала мне вельмі добра падрыхтаваны матэрыял, які
будзе ўлічаны пры далейшай працы над дакладам», — запэўніў Палецкіс.
Паводле ягонай інфармацыі, наступнае абмеркаваньне дакладу на пасяджэньні
Камітэту замежных спраў папярэдне заплянавана на 8 ліпеня,
а ў верасьні дакумэнт будзе вынесены на разгляд пленарнай сэсіі
Эўрапарлямэнту.
«Думаю, што там таксама будзе гарачае абмеркаваньне, — сказаў Палецкіс.
— Нам трэба будзе знайсьці кампраміс паміж тымі дэпутатамі, хто лічыць,
што перад самітам „Усходняга партнэрства“ ў Вільні ёсьць магчымасьць
наладзіць зь Менскам дыялёг пры ўмове вызваленьня палітвязьняў,
і тымі, хто лічыць, што, акрамя вызваленьня палітвязьняў, павінны быць
выкананы і іншыя ўмовы».
