Савет Свабоднага прафсаюза металістаў патрабуе спыніць дыскрымінацыю і пераслед сябраў арганізацыі
Свабодны прафсаюза металістаў
(СПМ) патрабуе ад кіраўніцтва краіны, урада спыніць дыскрымінацыю работнікаў па
прафсаюзнай прыкмеце, вярнуць працоўным канстытуцыйнае права на свабоду
аб'яднання ў прафсаюзы і ўсталяваць адміністрацыйную або крымінальную
адказнасць працадаўцаў і іншых прадстаўнікоў улады за дыскрымінацыйныя дзеянні
ў дачыненні да работнікаў. Пра гэта гаворыцца ў заяве, прынятай на Савеце СПМ,
які адбыўся 26 траўня:
“У Палаце прадстаўнікоў Нацыянальнага сходу РБ знаходзіцца на разглядзе праект
змяненняў і дапаўненняў у Працоўны кодэкс. Лёгка пераканацца, што яны носяць
дэкаратыўны неістотны характар. Так, будзе зменены ў тым ліку артыкул 14,
частка 1 па вызначэнні дыскрымінацыі. У прапанаваных зменах адсутнічае
адказнасць працадаўцаў за дыскрымінацыю па прафсаюзнай прыналежнасці, якая
набывае на беларускіх прадпрыемствах татальны характар. За апошнія 10 гадоў,
нягледзячы на ўсе намаганні Міжнароднай арганізацыі працы, міжнародных
прафсаюзных аб'яднанняў па спыненні парушэнняў правоў працоўных, беларускія
ўлады практычна пазбавілі працоўных канстытуцыйнага права работнікаў на
аб'яднанне. Выхад з "дзяржаўнага" прафсаюза (ФПБ), ўступленне або
сяброўства ў свабодным прафсаюзе мае адно наступства - звальненне з
прадпрыемства. У адміністрацыі прадпрыемстваў сістэма кароткатэрміновых
кантрактаў стала «эфектыўным" інструментам па пазбаўленні ад непажаданых,
актыўных работнікаў, якія не жадаюць знаходзіцца ў становішчы рабоў.
Сябры СПМ на прадпрыемствах г. г. Магілёва, Мінска, Жлобіна і іншых гарадоў
рэальна адчуваюць на сабе дыскрымінацыю, падвяргаюцца пастаяннаму
псіхалагічнаму і адміністрацыйнаму ціску. Пад адміністрацыйны «прэс» трапляюць
не толькі сябры СПМ, але і члены іх сем'яў і іншыя сваякі, якія працуюць на
прадпрыемстве.
На лідэраў рэгіянальных структур прафсаюза ціснуць спецслужбы, супрацоўнікі
КДБ, пад пагрозы рэпрэсіяў трапляюць і іх сваякі. У апошні час такія выпадкі
мелі месца ў Магілёве.
Савет СПМ патрабуе ад кіраўніцтва краіны, Урада спыніць дыскрымінацыю
работнікаў па прафсаюзнай прыкмеце, вярнуць працоўным канстытуцыйнае права на
свабоду аб'яднання ў прафсаюзы і ўсталяваць адміністрацыйную або крымінальную
адказнасць працадаўцаў і іншых прадстаўнікоў улады за дыскрымінацыйныя дзеянні
ў дачыненні да работнікаў".
Паводле www.bkdp.org
