Мінскі гарадскі суд пакінуў скаргу Ярашэвіча без задавальнення
Сёння ў Мінскім гарадскім судзе разгляд касацыйных скаргаў журналіста Аляксандра Ярашэвіча і блогера Дзмітрыя Галко, затрыманых 6-га мая побач з ізалятарам часовага ўтрымання на Акрэсціна.
Як стала вядома, скаргу журналіста "Радыё Рацыя" Ярашэвіча пакінулі без задавальнення. Напярэдадні паседжання ён адзначаў: “Асаблівых спадзяванняў аднавіць справядлівасць у Мінскім гарадскім судзе у мяне няма, але абскардзіць незаконны вырак, безумоўна, наш абавязак. Будзем дамагацца як мага шырокай агалоскі ўсіх парушэнняў!” - перадае прэс-служба БАЖ.
Вынікі разгляду скаргі Дзмітрыя Галко пакуль невядомыя.
Нагадаем, што сябраў ГА “БАЖ” Дзмітрыя Галко і Аляксандра Ярашэвіча затрымалі ўвечары 6 мая. Журналістаў даставілі ў Маскоўскі РУУС Мінска, дзе склалі адміністратыўныя пратаколы. На наступны дзень журналістаў прызналі вінаватымі ў хуліганстве і непадпарадкаванні міліцыі іасудзілі да розных тэрмінаў арышту: Галко – на 10 сутак, Ярашэвіча – на 12.
