Вользе Гайдуковай адмовілі ў спатканні з сынам
Андрэй Гайдукоў
Маці 24-гадовага жыхара Наваполацку, абвінавачанага ў "здрадзе дзяржаве", атрымала адмову ў спатканні з сынам ад следчага Віцебскай управы КДБ Алега Барысевіча. 8 траўня сканчваецца тэрмін знаходжаньня Андрэя Гайдукова ў СІЗА КДБ, але маці не ведае, ці будзе гэты тэрмін працягнуты.
"Мне нічога не вядома. Ніводнага разу з КДБ мяне не спавясцілі, што працягваюць тэрмін следства, пра гэта даводзіцца распытваць адваката. Але і адвакат не заўжды можа сустрэцца з Андрэем, бо зноў пачаліся праблемы: раней неяк ужо наладзілася ў СІЗА КДБ, адваката пускалі рэгулярна. А цяпер – ізноў не заўсёды….І адвакат не ўсё можа расказаць, бо ёсць падпіска пра неразгалошванне таямніцы следства", -- гаворыць маці абвінавачанага.
Вольга Гайдукова ведае з лістоў сына, што следства ўжо завяршылася, бо 29 красавіка ён напісаў, што пазнаёміўся з матэрыяламі справы. Цяпер іх мусілі перадаць у пракуратуру. Пасля 20 траўня можна чакаць суду, гаворыць маці:
"Усё ж я думаю, што да суду яго не адпусцяць. Тым больш, што мне не далі з ім спаткання. Я звярталася з такой заявай ужо два разы. Першы раз мне адмовілі, але следчы сказаў, што дадуць спатканне, магчыма, калі скончыцца следства. Ці перад судом. Следства скончылася. І мне – зноў адмова, прычым без усялякіх тлумачэнняў. Неўзабаве, напэўна, ужо будзе і суд, але на сустрэчу з Андрэем спадзявацца не выпадае.Добра, што ён піша нам лісты. Невялікія, на паўстаронкі. Але мне спакайней, калі ведаю, што ён у нармальным настроі, і нас яшчэ падтрымлівае".
Андрэй Гайдукоў знаходзіцца пад вартай ужо 6 месяцаў. Яго затрымалі 8 лістапада ў Віцебску, паводле афіцыйнай інфармацыі "падчас закладкі тайніка са звесткамі, якія могуць цікавіць замежныя спецслужбы". З тае пары тэрмін следства штораз працягвалі на месяц, і так на працягу паўгода. За гэты час некалькі разоў перарывалася перапіска Гайдукова з бацькамі, да яго не заўжды маглі трапіць адвакаты, маці двойчы адмовілі ў спатканні.
Напрыканцы мінулага года ў "шпіёнскай справе" з'явіўся яшчэ адзін падазраваны – наваполацкі прыхільнік стварэння партыі БХД Ілля Багданаў. Спачатку ён быў дапытаны ў якасці сведкі, потым хлопцу абвясцілі, што пераводзяць у статус падазраванага. Але праз некалькі месяцаў падазрэнні ў дачыненні да яго блі абвергнуты, і ён зноў з'яўляецца сведкам у справе Андрэя Гайдукова.
І ў Багданава, і ў Гайдукова адразу пасля затрымання апошняга былі праведзены ператрусы, на допыты выклікалі і іншых знаёмцаў затрыманага.
Сябры кажуць, што абвінавачанне ў шпіянажы і "здрадзе дзяржаве" падаецца ім абсурдным. Яны тлумачаць арышт Гайдукова памкненнем застрашыць іншых грамадскіх актывістаў. Гайдукоў быў удзельнікам шэрага апазіцыйных акцый, быў у камандзе Андрэя Саннікава падчас апошніх прэзідэнцкіх выбараў, а на мясцовых выбарах дапамагаў у кампаніях тамтэйшых дэмакратычных кандыдатаў.
