Адміністрацыя прэзідэнта не дала адказу на зварот грамадзян аб узнагароджанні Ярмошынай медалём “Герой Беларусі”
Старшыня Цэнтрвыбаркаму Лідзія Ярмошына
Грамадскі актывіст Аляксей Паўлоўскі падаў скаргу ў Генеральную пракуратуру з нагоды парушэння Закона “Аб зваротах грамадзян”. Ён разам з іншымі магілёўцамі накіраваў калектыўны зварот у Адміністрацыю прэзідэнта яшчэ 21 студзеня, аднак адказу адтуль ён не атрымаў дагэтуль.
У сувязі з парушэннем Закона Паўлоўскі просіць Генеральную пракуратуру знайсці вінаватых у дапушчаных парушэннях і прыцягнуць іх да адказнасці, аб чым хоча быць пісьмова ўведамлены.
Нагадаем, што 21 студзеня 13 магілёўцаў падпісалася пад зваротам на адрас Адміністрацыі прэзідэнта Рэспублікі Беларусь з просьбай прызначыць старшыні Цэнтрвыбаркама Лідзіі Ярмошынай медаль “Герой Беларусі” за ўнёсак у развіццё дэмакратыі і яе подзвігі ў арганізацыі выбараў усіх узроўнеў, якія дазволілі перамагчы патрэбным кандыдатам у першым туры, што здолела сэканоміць бюджэту краіны вельзарныя грашовыя сродкі.
