У Баранавічах публічная малітва -- пад забаронай

9 сакавіка ў Баранавічах маладым актывістам у цэнтры горада каля царквы святых Жон Міраносіц міліцыянты не дазволілі памаліцца за Беларусь. Ініцыятарамі публічнай малітвы выступілі хрысціянскія  дэмакраты.

Па словах удзельніцы мерапрыемства Анжэлы Камбалавай, з-за дрэннага надвор’я на супольную малітву прыйшло ўсяго 10 чалавек. У руках у людзей былі знічкі. Трох маладзёнаў адразу затрымалі міліцыянты нібы для праверкі дакументаў, але праз паўгадзіны адпусцілі. Улічваючы няроўнасць сілаў (міліцыянтаў і людзей у цывільным было больш, чым сабраўшыхся на малітву), актывісты раздзяліліся папалам. Адны пайшлі ў будынак царквы, дзе паставілі свечкі і памаліліся. Другая група паставіла знічкі і ўзнесла свае малітвы ля крыжа ахвярам сталінскіх рэпрэсій.