Дзяржава ня мае грошай на выданьне насьценных беларускамоўных календароў з выявай класікаў беларускай літаратуры Янкі Купалы і Якуба Коласа

Міністэрства інфармацыі адказала грамадзкаму аб'яднаньню "Таварыства беларускай мовы імя Францішка Скарыны" (ТБМ) на прапанову аб тэрміновым выданьні дзяржавай насьценных беларускамоўных календароў з выявай клясыкаў беларускай літаратуры.

У лісьце за подпісам намесьніка міністра інфармацыі Ігара Лапцёнка гаворыцца, што парадак выпуску выданьняў з прыцягненьнем бюджэтных сродкаў "строга рэглямэнтаваны і выдзяленьне субсыдыяў на выпуск календароў па замовах і дзеля патрэбаў арганізацыяў, установаў, грамадзкіх аб'яднаньняў не прадугледжанае". Разам з тым, як зазначаецца ў лісьце, не выключаецца магчымасьць выпуску насьценных беларускамоўных календароў "на ўмовах замовы з абавязковым выкупам накладу".

У інтэрвію агенцтву БелаПАН старшыня ТБМ Алег Трусаў назваў адказ міністэрства "праяваю антынацыянальнай палітыкі і зьдзекам над людзьмі". Паводле Трусава, адной з задачаў дзяржавы ў год юбілею народных паэтаў Беларусі якраз і зьяўляецца выпуск такой прадукцыі з аплатай адпаведнай замовы. На думку старшыні ТБМ, дзяржава робіць "вялікую памылку", не выпускаючы перакідныя ды насьценныя каляндары на беларускай мове. Ён мяркуе, што бюджэтныя выдаткі акупіліся б поўнасьцю, бо беларускамоўныя каляндары карыстаюцца вялікім попытам у грамадзтве.

" З-за таго, што ТБМ ня мае сродкаў на выпуск такіх выданьняў, аб'яднаньне будзе працягваць традыцыю выданьня беларускамоўных памятных каляндарыкаў, прысьвечаных знамянальным датам айчыннай гісторыі і культуры, — пракаментаваў сітуацыю Алег Трусаў. — У прыватнасьці, аб'яднаньне рыхтуе выпуск каляндарыкаў, прысьвечаных 120-годзьдзю Алеся Гаруна і 90-годзьдзю Янкі Брыля".