БХД заклікае да правядзення “Хвалі салідарнасці” з палітвязнямі

Беларуская хрысціянская дэмакратыя ладзіць “Хвалю салідарнасці” з палітвязнямі. Акцыі рознага кшталту пройдуць у 35 гарадах і мястэчках Беларусі штодня з 12 лютага па 24 сакавіка.

Па словах аднаго з лідараў БХД Віталя Рымашэўскага, - мэта марафону салідарнасці - прыцягнуць увагу ў рэгіёнах да праблемы існавання ў краіне палітвязняў: 

- Мы заклікаем далучацца ўсіх без выключэння. Палітычныя партыі могуць ладзіць палітычныя акцыі, грамадскія арганізацыі могуць ладзіць акцыі ў сваім фармаце, мы заклікаем хрысціянскія цэрквы ўсіх канфесій праводзіць набажэнствы, заклікаем простых людзей ладзіць флэшмобы, акцыі, якія яны могуць. Галоўным вынікам будзе кожны новы чалавек, які дашле палітвязню ліст, паставіць подпіс за вызваленне палітвязня праз інтэрнэт ці ўжывую, які далучыцца да гэтай “Хвалі салідарнасці”.

Паводле праваабаронцаў, у турмах Беларусі па палітычных матывах утрымліваецца 11 чалавек. Сярод іх, былы кандыдат у прэзідэнты Мікалай Статкевіч, кіраўнік праваабарончага цэнтра “Вясна” Алесь Бяляцкі, ваўкавыскі прадпрымальнік і грамадскі дзеяч Мікалай Аўтуховіч ды іншыя.