Макей прызнаў, што ў Беларусі парушаюцца правы чалавека?
Міністр замежных спраў Беларусі Уладзімір Макей
Даклад Міністэрства замежных спраў Беларусі не зрабіў у свеце ўражання выбухнуўшай бомбы. І ў нашай краіне ён падзеяй тыдня не стаў. Многія проста не звярнулі на яго ўвагі. А дарэмна, бо гэта па-свойму ўнікальны дакумент, піша "Салідарнасць".
З дакладу, уступнае слова да якога напісаў міністр замежных спраў Уладзімір Макей, становіцца зразумела, што, з пункту гледжання МЗС Беларусі, з'яўляецца парушэннем правоў чалавека. Гэта ў прыватнасці:
- Затрыманні, арышты і збіццё дэманстрантаў;
- Адлічэнне з ВНУ па палітычных матывах;
- Забарона на выезд з краіны;
- Негуманнае абыходжанне з вязнямі (перанаселенасць турмаў, антысанітарны стан камер, недахоп ложкаў і г.д.);
- Судовыя працэсы супраць журналістаў.
Гэта значыць усё тое, што актыўна практыкуюць беларускія ўлады. Тым самым МЗС, верагодна сам таго не жадаючы, ускосна прызнаў, што ў нашай краіне парушаюцца правы чалавека.
З фактаў, прыведзеных у дакладзе "Парушэнні правоў чалавека ў асобных краінах свету ў 2012 годзе", вылучым наступныя:
"Кандыдат [у прэзідэнты ЗША] ад Зялёнай партыі Дж. Стэйн падчас выбарчай кампаніі некалькі разоў падвяргалася адміністрацыйным арыштам за ўдзел у мірных акцыях пратэсту".
Гэты прыклад асабліва замілоўвае на фоне таго, што пасля прэзідэнцкіх выбараў 2010 года ў Беларусі былі арыштаваныя 7 з 8 апазіцыйных кандыдатаў. Адзін з іх, Мікалай Статкевіч, знаходзіцца за кратамі да гэтага часу.
"Пагаршэнне эканамічнай сітуацыі ў Польшчы даводзіць людзей да роспачы. У 2012 годзе колькасць самагубстваў, у тым ліку на глебе эканамічных праблем, вырасла на 20%".
Беларусь з'яўляецца адным з сусветных лідэраў па колькасці самагубстваў на 100 000 жыхароў (па розных дадзеных, ад 22,9 да 25,3 у 2011 годзе). Гэты паказчык у нас значна вышэй, чым у Польшчы (14,9). У адрозненне ад сярэдняга заробку, які ў суседняй краіне складаў 1 257 даляраў (снежань 2011 года).
"З 1 па 25 кастрычніка некалькі бальніц Таліна і адна клініка ў Тарту прынялі ўдзел у страйку работнікаў сферы аховы здароўя. Медыкі патрабавалі павышэння зарплаты і зніжэння нагрузкі".
МЗС Беларусі лічыць гэта сведчаннем парушэння права эстонскіх гіпакратаў на "дастатковы жыццёвы ўзровень". У сувязі з гэтым варта прывесці дадзеныя тамтэйшага Саюза лекараў, згодна з якім сярэдні заробак мясцовых медыкаў у 2012 годзе складаў 1 528 еўра ў месяц (прыкладна ў 1,5 разы больш за сярэдні па краіне).
Для параўнання: паводле звестак Нацыянальнага статыстычнага камітэта, сярэдні заробак у беларускай ахове здароўя ў снежні 2012 года склаў 3 075 951 рубель. Гэта 271 еўра ў эквіваленце і амаль на 20% менш за сярэдні па краіне.
